Pjesa më e madhe e shqiptarëve mendojnë se situata ekonomike e vendit është e mirë, edhe pse renditemi të fundit në Europë në raport për të ardhurat për frymë.
Paradoksi vjen pas një vrojtimi të kryer nga eurobarometër, për llogari të Komisionit Europian, cituar nga Top-channel.
Raporti del në përfundimin se 55 për qind e shqiptarëve mendojnë se gjendja ekonomike e Shqipërisë është përgjithësisht e mirë, 44 për qind e vlerësojnë atë përgjithësisht të keqe, ndërsa 1 për qind nuk ka dhënë asnjë vlerësim.
Eurobarometër ka pyetur 1083 veta, gjatë periudhës nga 20 deri në 28 maj të këtij viti, që përkon me çeljen e fushatës elektorale. Intervistat janë zhvilluar ballë për ballë dhe rezultatet u publikuan në faqen zyrtare të Komisionit Europian dy ditë më parë, sipas TCH.
Madje shqiptarët janë më optimistë ndaj ekonomisë edhe se sa qytetarët e vendeve të bashkimit europian, ndonëse i kanë të ardhurat për frymë 3.3 herë më pak se ta.
Sipas vrojtimit, në vendet e BE-së, janë vetëm 45 për qind e qytetarëve që e vlerësojnë si të mirë situatën ekonomike të vendit të tyre, ndërsa 51 për qind mendojnë se ajo është e keqe./ tesheshi.com/
