Nga Blendi Gashi
Seanca e jashtëzakonshme e Kuvendit të Kosovës e caktuar për të debatuar për aktvendimin e Gjykatës së Apelit që konfirmoi dënimin paraprak të grupit “Drenica II”, e filluar me një orë vonesë, ka përplasur fort deputetët e partive në pushtet dhe atyre në opozitë.
Edhe pse të dy palët njëzëri theksuan se dënimet ndaj ish-komandatëve të UÇK-së janë të padrejta, deputetët opozitarë fajësuan ata të mazhorancës se kanë thirrur një debat të tillë vetëm për të derdhur lot krokodili, pasi janë vetë ata që një vit më parë votuan për Gjykatën Speciale, dhe vet ua bën burgun bashkëluftëtarëve të tyre.
Se ligjvënësit nuk ishin të interesuar të debatojnë për çështjen e thirrur, e dëshmojnë përplasjet e forta mes tyre ku debatin e shndërruan në fyerje, akuza e kundër akuza ndaj njëri-tjetrit, dhe treguan se atyre u intereson vetëm të përlahen.
Përplasjet më të forta u zhvilluan mes deputetëve të PDK-së dhe atyre të Vetëvendosje-s e Aleancës për Ardhmërinë e Kosovës (AAK), por jo vetëm.
Keq u konfrontuan zv.kryeministri Hajredin Kuçi e Zafir Berisha i NISMA-a, Bekim Haxhiu i PDK-së me Fisnik Ismailin e VV-së, Xhevahire Izmaku e PDK-së me Donika Kadaj-Bujupin.
“Shtyhen kush e ka CV-në më të fortë”
Opozitari Zafir Berisha në fjalimin e tij përveç Hashim Thaçit për të cilin kërkoi që Kuvendi të nxjerr rezolutë dhe ta shpall tradhëtar, ai goditi edhe zv.kryeministrin Hajredin Kuçi duke thënë se “nuk pastrohet njeri duke dhënë doërheqje nga minsitri i Drejtësisë”.
Kjo deklaratë e bëri të reagoi ashpër Kuçin i cili tha Berishës që le ta shikojë CV-në e tij, dhe do ta shohë, se cila do të dal më e pastër.
Në replikën e tij Berisha ka thënë se kur ai ishte në burgje Hajredin Kuçi shërbente si polic në kur Kosova ishte nën regjimin e Serbisë.
Kuçi i është përgjigjur Berishës se në kohën kur ai e akuzon që ka punuar polic ka qenë në mosh shumë i ri, por është lavdëruar se ka qenë nxënës i mirë.
Ai i është drejtuar Berishës së pas 12 qershorit të vitit 1999, “Zoti ju ndihmoftë për veprimet që keni bërë”.
Në këtë debat është përfshirë ëshë kryetari Veseli i cili i është drejtuar Zafir Berishës së po e akuzon pa drejtë Kuçin. Veseli ka thënë se Kuci ka qenë pjesëtarë i UÇK dhe se ka dhënë kontribut.
Ai ka thënë se edhe Zahir Pajaziti të cilin e ka quajtur emblemë të UÇK ka qenë polic.
Por, Kadri Veselit i ka reaguar deputeti i AAK-së Daut Haradinaj se ka bërë gabim të madh kur ka krahasuar Zahir Pajazitin me Hajredin Kuçin.
“Kush po bën demagogji”?
Një përplasje tjetër u zhvillua mes deputetit Bekim Haxhiu-Kamishi të PDK-së dhe Fisnik Ismailit të VV-së.
Deputeti Haxhiu drejtoi gishtin kah Vetëvendosje siç tha se po bën demagogji dhe se fshehtur ka përgatitur raporte të fshehta kundër UÇK-së
“Nuk dëshironi që gjykata të bëhet me gjyqtar amerikan”, ka thënë Haxhiu.
Deputetit të PDK-së i reagoi Fisnik Ismaili i cili i tha “Kamishit” se “boll kajte rrejshëm. Krejt veç ty me të besu dikush hajgare ështe kjo punë”.
“Kapen mes vete edhe gratë deputete”
Por në seancën e sotme ndodhi edhe një përplasje mes deputetëve femrave, Xhevahire Izmakut të PDK-së dhe Donika-Kadaj-Bujupit të VV-së.
Kjo pasi që Kadaj-Bujupi, tha se deputetët që kanë votuar Specialen janë duke shfaqur hipokrizi në lidhje me dënimet e luftëtarëve të UÇK-së për krime lufte.
Kjo nuk i pëlqei asapak Izmakut e cila i tha se; “a munesh me na kallxu në emër të cilës parti po flet AAK-së apo Vetëvendosje. Dhe a mundesh me na tregu pse ke ikë nga AAK-ja, të kanë larguar apo??”, tha Izmaku.
Kadaj-Bujupi nuk u përgjigj në pyetjen e lartcekur po i tha Izmakut të tregoi se “a ka votuar apo jo për Specialen”?
Përplasen edhe Veseli e Limaj
Një përplasje ndodhi edhe mes kreut të Kuvendit Kadri Veseli dhe kreut të NISMA-s, Fatmir Limaj të cilët edhe pse replikuan me njëri-tjetrin nuk pranonin të thonin se po përplasen mes tyre.
Veseli i replikoi Limajt lidhur me deklaratat se seanca e sotme për vlerat e UÇK -së është e vonuar.
Veseli është shprehur se kjo seancë është thirrur me kërkesën e deputetëve e në pajtueshmëri me Kushtetutën e vendit.
Ndryshe, deputetë të caktuar kohë pas kohe bën thirrje që të debatohet për çështjen që është thirrur seanca e mos ngrihen çështje individuale që më pas po nxitin edhe përplasje e fyerje mes deputetëve.
Debati për grupin e “Drenicës” do të vazhdoj edhe pasdite me deputetët e tjerë që janë lajmëruar për të folur si dhe në fund pritet të miratohet një projekt-rezolutë. /tesheshi.com/
