Politikani dhe biznesmeni i njohur kosovar Behgjet Pacolli ka ndërhyrë me një status në debatin mbi kinse konvertimet në Kosovë, duke u shprehur kritik ndaj llojit se si ai po zhvillohet në studiot e mediave.
“Jam tejet i shqetësuar nga niveli që ka arritur debati për fenë. Pa dashur të minimizoj të drejtën e çdokujt për shprehjen dhe mendimin e vet, ajo që po diskutohet kohët e fundit në studiot televizive lidhur me fenë dhe konvertimet ka kaluar çdo kufi të mirësjelljes kultures dhe respektit ndaj të tjerëve.
Feja është e lirë dhe e garantuar me Kushtetutë, dhe konvertimi është e drejtë e çdo individi. Por askush nuk ka të drejtë të ofendojë fenë te ciles i ka shërbyar deri dje, se ajo mbetet edhe më tutje feja e të tjerëve”, shkruan njeriu që ka qenë si president e si ministër i Jashtëm i Kosovës.
Më tej Pacolli shpreh padakortësi me vetë të konvertuarit, tezat e tyre.
“Është patetike dhe e padrejtë të thuhet se dikush konvertohet sepse Perëndimi nuk po na pranon si muslimanë!!!
Si mysliman praktikues (familja ime mirëmban për 30 vite Xhaminë në Lugano), dhe asnjëherë as mua dhe as familjes time të gjerë nuk na ka penguar feja jonë në integrimin dhe bashkëjetesën me popullatat me besime të ndryshme.
Ju lutem, ndaloni këto debate përçarëse që janë bërë të neveritshme.
Le ta duan secili fenë e vet dhe mënyrën që ka zgjedhur për të bashkëjetuar me te por mos te ofendon fenë e të tjerëve!!!”, përfundon kjo figurë e njohur e jetës publike të Kosovës.
