Nga Blendi Gashi
Një lajm i publikuar nga televizioni Klan Kosova se Lëvizja Vetëvendosje përmes një organizate joqeveritare të quajtur “Iniciativa për Prishtinën”, ka organizuar bartjen dhe shtyrjen e njerëzve për ta votuar kandidatin e saj për kryetar të Prishtinës, Shpend Ahmeti, në balotazhin e zgjedhjeve lokale të dielën, ka ngjallur reagimin e ashpër të LDK-së e cila e quan veprim të kundërligjshëm.
Kjo parti kërkon që organet kompetente ta hetojnë pamjet e publikuara nga televizioni në fjalë sipas të cilave, OJQ-ja u telefon qytetarëve dhe u ofron transport për të votuar, ku në mesin e tyre rastësisht telefonohet edhe gazetarja e këtij televizioni.
Visar Ymeri e Shpend Ahmeti me deklarata kundërthënëse
Vetëvendosje në fillim u mundua ta mohojë por më pas u dorëzua për çka kanë dhënë deklarata kundërthënëse Shpend Ahmeti e Visar Ymeri.
“Është më se e qartë se kush ka qenë i angazhuar për ta kthyer nëntokën në Prishtinë. Po ashtu është e qartë sa paraja ka hy në këtë betejë kundër nesh. Koalicionet e fshehta te krejt ketyre të mbêshtetura prej portaleve kriminele nuk patën sukses. Tash kur po e dijnë se edhe votat me kusht do ta konfirmojnë fitoren tonë po mundohen me shpifje e sulme të dezinformojnë. Ne jemi të fokusuar në mbrojtjen e çdo vote dhe mbrojtjen e fitores deri ne fund. Falemnderit të gjithëve për mbështetjen me të cilen nuk lejuam që krimi të kthehet në Prishtinë”, ka shkruar Ahmeti në Facebook.
Por kryevetëvendosësi Ymeri sot në një konferencë për media ka demnatuar Ahmetin duke pranuar se kanë organizuar transport për votuesit në Prishtinë.
“Votuesit që janë deklaruar në VV se kanë nevojë për transport, natyrisht se ne iu kemi ofruar një gjë të tillë.KQZ merr masa të heshtura që kanë për synim dekurajimin e votuesit, duke ua ndërrruar vendvotimin. VV përkundër kësaj e inkurajon votuesin dhe kjo është e rëndësishme për qytetarin”, ka deklaruar Ymeri.
Ai e ka marrë si shembull kryeministrin kanadez, i cili gjatë kohës së zgjedhjeve kishte publikuar në llogarinë e tij në Twitter numrin ku qytetarët mund të lajmëroheshin nëse kishin nevojë për transport.
Se ka organizuar transport për votusit ka pranuar edhe Mytaher Haskuka që doli fitues në Prizren.
“4-5 vetura kanë qenë të angazhuara për t’i dërguar votuesit nëpër vendvotime në Komunën e Prizrenit”, ka thënë Haskuka të hënën në Interaktiv të KTV-së, duke u arsyetuar se votuesit kanë qenë kryesisht të moshuar e të sëmurë.
LDK: VV si “Pronto”, të veprojnë organet kompetente
Ndërsa VV nuk e shohin të jashtëligjshme veprimin në fjalë, LDK-ja ka reaguar ashpër duke kërkuar që organet e drejtësisë ta thonë fjalën e tyre, ku eksponentë të kësaj partie kanë krahasuar VV-në me “Pronton” e PDK-së.
Abrashi, kandidat i LDK-së për Prishtinën thotë se VV-në se ka bërë presion tek votuesit dhe se drejtësia duhet të reagojë.
“Po shohim që ata që bën koalicione të hapura e të fshehta me oligarkë e biznismenë/politikanë vetëm që me çdo kusht të mbesin në pushtet, tash zbulohet edhe se kanë përdorë metoda kundërligjore vetëm e vetëm që ata të jenë në pushtet.
Organizimi i transportit të qytetarëve përmes OJQ-ve për të votuar, ka synim ushtrimin e ndikimit mbi votën e tyre të lirë dhe deformon vullnetin e tyre popullor.
Do ta kërkojmë nga organet kompetente të hetojmë këtë rast deri në fund dhe pastaj do të vendosim sesi të veprojmë. Por ajo që po vërtetohet gjithnjë e më shumë është se Prishtina tashmë ka një kryetar të ri”, thotë Abrashi.
Ndaj rastit në fjalë kanë reaguar edhe zyrtarë tjerë të LDK-së.
Deputeti Armend Zemaj, kërkon të dihet se kush e financoi OJQ-në për bartjen e votuesve.
“Kush janë këta, kush i financoi, kush i siguroi pagesat, kush i mësoi , cila shkollë, cilit grup i takojnë?. Krejt këtyre pytjeve duhet t’ju japë përgjigje prokuroria”, thotë ai.
Ndërsa Bajram Gecaj, ish-këshilltar i Mustafës VV-në e krahason me “Pronton” e PDK-së.
“Deri sa më herët kisha shkruar për ekzistimin e njëfarë SHIK-u të LVV-së, tani këta na dalin metodikisht të njëjtë edhe me “PRONTO-n” e avokuar aq zhurmshëm dhe aq shpesh nga ta. Raportimet e parregullsive nga QNR si dhe raporti nga lajmet e Klan Kosova për bartjen e organizuar të votuesve, në emër të një OJQ-je enigmatike, provon se edhe këta vetë funksionojnë me vrazhdësinë dhe metodat e njëjta si të themeluesve real (paraardhësve) të tyre – SHIK-ut dhe PDK-së; e çka këta i shndërron edhe në Makiavelistë”, ka thënë Gecaj për tesheshi.com.
A u shkel ligji?
Ndërsa LDK e quan shkelje të ligjit bartjen e votuesve nëpër vendvotime, publicisti Veton Surroi i ka dale në përkrahje Vetëvendosje-s duke i ka quajtur media të pushtetit, ato që raportuan një lajm të tillë pasi sipas tij nuk është shkelje ligji.
“Të organizosh transport për të votuar në Amerikë dhe shtetet evropiane është aktivitet joligjor aq sa lindja e diellit. Në mediat e pushtetit në Kosovë ky aktivitet quhet krim i organizuar”, shkruan Surroi në Facebook.
Ja ç’thotë ligji për zgjedhjet e përgjithshme:
Neni 36
Veprimet e Ndaluara Para Procesit të Votimit
36.1 – Njëzetekatër (24) orë para hapjes së Qendrave të Votimit për hedhjen e votës, e deri në mbylljen e
tyre, subjekteve politike, mbështetësve ose kandidatëve të tyre u ndalohet secili prej veprimeve si më poshtë:
- a) shpërndarja ose shfaqja në mënyrë tjetër në ndonjërën nga Qendrat e Votimit, ose 100 metra brenda
hapësirës së të njëjtës, e çfarëdo lloj materiali me qëllim ndikimi tek votuesit;
- b) bërja e fushatës në çfarëdo mënyre.
Më poshtë gjeni videon ku tregon si u transportuan votuesit të dielën në vendvotime në Prishtinë:
