Kryeministri hungarez, Viktor Orban apeloi Bashkimin Europian të japë ndihmë financiare për shtetet fqinje të Sirisë, që këto të fundit të mbështesin refugjatët e zhvendosur nga lufta. Sipas Orban, 3 miliardë euro për Turqinë, Libanin dhe Jordaninë do t’i jepnin fund fluksit masiv të refugjatëve drejt Europës.
Hungaria ndodhet në vështirës për shkak se i duhet të përballojë rreth 150 mijë refugjatë që kanë kaluar kufirin e saj deri tani, këtë vit.
Autoritetet po ndërmarrin masa të ashpra, që nga mbyllja e kufijve e deri tek vendime të tilla, si ai i një dite më parë, kur u njoftua se njerëzit që do të hyjnë në vend në mënyrë të paligjshme, do të arrestohen.
Në një intervistë me gazetën gjermane Bild, Orban tha se fondi shtesë prej 3 miliardë euro do të mblidhej nga secili vend i BE-së, me vetëm 1 për qind ekstra nga buxheti ose nga reduktimi me 1 për qind i shpenzimeve të përgjithshme të BE-së.
“Kjo do të thotë se nëse ne mbështesim fqinjët e Sirisë, me ndihmë masive financiare, refugjatët do të kthehen aty ku ishin më parë”, tha Orban, duke shtuar se “Këta njerëz nuk ikin nga rreziku”.
Plani hungarez pritet të depozitohet në takimin më të parë të BE-së.
“Ata vijnë në Europë për shkak se kërkojnë siguri, por ata dëshirojnë edhe një jetë më të mirë. Kushtet e jetesës në Greqi, Maqedoni, Serbi, Hungari e Austri nuk ua mbushin mendjen”, tha Orban, i cili ka shprehur edhe me parë kundërshtinë e tij me hapjen e kufijve të Europës për refugjatët. /tesheshi.com/
