Nga Blendi Gashi
Bisedimet ndërmjet Kosovës dhe Serbisë pritet të fillojnë menjëherë pas festave të fundvitit, së pari në nivelin teknik më pas edhe në nivel të kryeministrave.
Kështu kanë bërë të ditur drejtuesit e institucioneve të Kosovës por edhe të Serbisë, edhe pse kanë dhënë deklarata kontradiktore përkitazi me temat që mund të ngrihen për diskutim në takimin e janarit.
Por vazhdimi i këtyre bisedimeve aspak nuk po i pëlqen opozitës kosovare e cila thotë se shkelësit e Kushtetutës, siç e quajnë kryeministrin Isa Mustafa dhe delegacionin kosovar, nuk kanë legjitimitet të vazhdojë më tej bisedimet me Serbinë, sidomos pas aktgjykimit të Kushtetueses për Asociacionin.
Këto deklarata të opozitarëve siç duket aspak nuk i bëjnë përshtypje kryeministrit Isa Mustafa i cili ka bërë të ditur se do të takohet me homologun e tij serb, Aleksandër Vuçiq në muajin janar.
“Duhet të definohet edhe çështja e Asociacionit dhe të merret edhe mendimi i Brukselit”, ka deklaruar në një emision televiziv, Mustafa.
Ministrja për Dialog, Edita Tahiri, ka deklaruar se në takimin e radhës me palën serbe do të bisedojnë për zbatimin e marrëveshjeve në fushën e lëvizjes së lirë, diplomave dhe kadastrës.
Por tema tjera ka përmendur drejtori i të ashtuquajturës Zyrë për Kosovë në Qeverinë e Serbisë, Marko Gjuriq. Pas marrëveshjes për themelimin e Asociacionit të komunave serbe në Kosovë, sipas Gjuriqit, në tavolinën e negocimit duhet të vijnë për t’u sqaruar disa pyetje të tjera, si statusi dhe pronësia e Kishës Ortodokse Serbe, prona publike dhe private serbe, të pagjeturit, njohja e diplomave universitare dhe çështje të tjera.
Mirëpo partitë opozitare dhe analistët thonë se qeveria e drejtuar nga Isa Mustafa duhet të ndalet dhe në asnjë mënyrë nuk mund të vazhdojë bisedimet me Serbinë.
Ish-kryekuvendari, Jakup Krasniqi ka deklaruar për portalin tesheshi.com se të gjithë aktorët që kanë qenë në bisedimet e Brukselit, duke filluar nga kryeministri Mustafa, zv. i tij Thaçi dhe znj. Tahiri, pas akgjykimit të Kushtetutës nuk e kanë as besimin e as kredibilitetin që t’i vazhdojnë bisedimet me Serbinë.
“Vazhdimi i bisedimeve nga këta njerëz mund të shkaktoj probleme tjera dhe nuk do të ishte e mirë për vendin. Në një situatë të tillë kush mund të garantoj që këta njerëz nuk e vazhdojnë me të vjetrën? Bisedime në një format tjetër mund të bisedojnë, por pas zgjedhjeve të reja”, ka deklaruar ish kryeparlamentari Krasniqi.
Zëdhënësi i Lëvizjes ‘Vetëvendosje’, Frashër Krasniqi në një prononcim për portalin tesheshi.com se qeveria Mustafa, s’mund dhe nuk ka kredibilitet të vazhdojë bisedimet me Serbinë pasi kanë shkelur Kushtetutën e vendit.
“Nuk mund t’ua besojmë shkelësve të Kushtetutës qeverisjen e vendit, e aq më pak vazhdimin e negociatave. Ndaluni ose do t’ju ndalim!”, ka deklaruar Krasniqi.
Analistët: Të anulohen bisedimet me Serbinë
Analisti politik, Islam Krasniqi, mendon se bisedimet me Serbinë duhet të anulohen sepse qeveria që aktualisht udhëheq me vendin ka humbur fuqinë, dhe kredibiliteti i saj ka ra në zero, sepse sipas tij ka humbur besimin e qytetarëve.
“Ministrja Tahiri ka paralajmëruar së pas festave të fundvitit, përsëri do të vazhdojnë bisedimet me Serbin në aspektin teknik dhe politik, e cila edhe një herë e tregon së sa e papërgjegjshme që është për veprimet shtetërore që i ndërmerr sikur të rasti i Fusnotës.
Pas vendimit të Kushtetueses për Asociacionin, Kosova menjëherë duhet të ndërprenë dialogun me Serbinë, sepse janë vë nënshkrime në Bruksel nga qeveritarët tanë në kundërshtim me kushtetutën e Republikës së Kosovës. Bisedimet me Serbinë duhet të anulohen deri në formimin e një qeverie tjetër dhe derisa shteti serb ta njeh shtetin e Kosovës”, ka deklaruar Kransiqi. /tesheshi.com/
