Ka zgjedhur Prizrenin opozita e Kosovës para protestës së madhe të fillim janarit në kryeqytet.
Tre partitë opozitarë i kanë kërkuar qytetarëve të Prizrenit mbështetjen për protestën e madhe të janarit, ku Vetëvendosje, AAK dhe Nisma, synojnë të japim goditjen finale ndaj qeverisë Mustafa-Thaçi.
Kryetari i lëvizjes Vetëvendosje, Visar Ymeri, sulmoi kreun e komunës së Prizrenit: “Ju, qytetarë të Prizrenit, e dini shumë mirë se çfarë do të thotë të kesh kryetarin e komunës edhe të korruptuar, edhe të dënuar, por edhe në pushtet. Po ashtu, ju e dini se çfarë do të thotë të keni politikanë të korruptuar të cilët janë në pushtetin qendror dhe e kanë uzurpuar këtë pushtet.
Dje, prokurorët dhe gjykatësit e këtij pushteti ua kanë vazhduar edhe për 60 ditë paraburgimin. Regjimi policor i treshes famëkeqe Isa Mustafa, Hashim Thaçi e Kadri Veseli është ngritur kundër popullit, sepse është ngritur kundër përfaqësuesve të qytetarëve të kësaj Republike”.
Kryetari i Nismës për Kosovën, Fatmir Limaj tha se opozita do të qëndrojë e bashkuar në kundërshtimin e marrëveshjes, deri në anulimin përfundimtar të saj.
“Ju kujtohet se ata për Jabllanoviçin u detyruan të presin tre apo katër muaj për ta shkarkuar!? Unë nuk e di pse po e vonojnë edhe këtë punë?! Këtu vonesë ka, po shpëtim s’ka. Këto marrëveshje nuk kalojnë”, tha Limaj. Ndërsa në vend të Ramush Haradinajt, foli sekretari i AAK-së, Blerim Kuçi.
/tesheshi.com/
