Dy shtetas u arrestuan nga policia e Tiranës, në bashkëpunim me Forcën e Posaçme Operacionale, ndërkohë që një i tretë është shpallur në kërkim, me akuzën e “vjedhjes me dhumë”, e kryer në bashkëpunim, dhe “shtrëngim me anë të kanosjes ose dhunës për dhënien e pasurisë”.
Burime nga policia bëjnë të ditur përfundimin me sukses të operacionit “Diamantët”, ku u arrestuan shtetasit Enea Duraj, 26 vjeç, lindur në Kuçovë, dhe Renato Toska, 28 vjeç, lindur në Ballsh, të dy banues në Tiranë, ndërsa është bërë shpallja në kërkim e shtetasit E. H., 31 vjeç.
“Pas një pune hetimore profesionale për hetimin e ngjarjes së ndodhur më datë 19.08.2017, ku shtetasit e sipërpërmendur dyshohet se kanë grabitur me dhunë shtetasin R. S., në vendin e njohur si Yrshek, Tiranë, ku i kanë marrë një sasi monetare dhe disa sende, të cilat ky shtetas i mbante në çantë, ka rezultuar se:
nga hetimi me metoda speciale, rezultoi se të arrestuarit kanë kanosur shtetasin R. S., me qëllim përfitimin e shumës monetare prej 10 000 Euro.
Në momentin e ndërhyrjes nga Forca Operacionale, janë konstatuar shtetasit Enea Duraj dhe Renato Toska, të cilët janë arrestuar në kohën e dorëzimit të kësaj shume monetare.
Gjatë kontrollit u janë gjetur dhe sekuestruar në cilësinë e provës materiale, shuma monetare prej 5000 Euro dhe 300 000 Lekë të reja, të cilat i janë vënë në dispozicion nga shtetasi R. S”, thuhet në njoftimin e policisë. /tesheshi.com/
