Nëntëmbëdhjetë vetë u vranë dhe dhjetëra të tjerë u plagosën gjatë sulmeve më të reja ajrore siriane dhe ruse në Halep dhe në rrethina.
Gjatë sulmit janë përdorur armë të ndaluara ndërkombëtarisht, dhe shënjestër e sulmeve kanë qenë dhe dy spitale.
Organizata Botërore e Shëndetësisë ka njoftuar se dy spitalet kanë pushuar së punuari.
Për shkak të përkeqësimit të gjendjes në Halep, ka reaguar edhe sekretari i përgjithshëm i OKB-së.
“Këtë mëngjes kemi marrë raportet për sulmet në dy spitalet në Halep. Le të jetë e qartë: ata që po përdorin armë përherë e më shkatërruese e dinë shumë mirë se çfarë po bëjnë. E dinë se po kryejnë krime lufte. Mund të paramendoni se për çfarë niveli të vuajtjes po flasim: njerëz pa gjymtyrë, fëmijë me dhimbje të tmerrshme, pa mundësi të ofrimit të ndihmës, të infektuar, dhe duke vdekur pa kurrfarë rrugëdalje tjetër. Vuatjeve nuk u duket fundi. Është më keq se në thertore. Thertoret janë më humane. Spitalet, klinikat, ambulancat dhe personeli mjekësor në Halep janë nën sulme të vazhdueshme. Sipas organizatës Mjekët për të Drejtat e Njeriut, 95% e personelit mjekësor e ka braktisur qytetin, është mbyllur apo është vrarë. Kjo është luftë kundër punëtorëve shëndetësorë,” ka thënë Ban Ki-Moon.
Ai ka cituar një mjek të ketë thënë se civilët në Halep po vriten si insektet.
Fjalë dhe më të ashpra kanë përdorur ambasadorët e shumtë të Këshillit të Sigurimit.
“Dy spitale të mëdha në Halepin lindor janë bombarduar mbrëmë qëllimisht. Nëse këto nuk janë krime lufte, atëherë çfarë janë krimet e luftës?”, ka pyetur ambasadori francez në OKB, Francois Delattre.
“Është më se e qartë se bombardimi i Halepit po kryhet nga qeveria siriane dhe rusët. Rusët do të jenë në pozitë të vështirë, ngase do të duhet të përdorin veto ndaj rezolutës për ndërprerjen e zjarrit, e cila në fakt është ideja të cilën ata e përkrahin.”
Pyetjes së një gazetari të Al Jazeera-s nëse ushtria siriane i ka bombarduar dy spitalet në Halep, ambasadori sirian i është përgjigjur vetëm me buzëqeshje. Sipas gazetarit, ky është një gjest i pazakonshëm për një ambasador të një shteti qeveria e të cilit është duke u akuzuar për krime lufte.
Ky është sulmi më i madh gjatë fushatës së fundit në Halep, që ka për qëllim përndjekjen e forcave kryengritëse dhe marrjen nën kontroll të të gjithë qytetit. /tesheshi.com/
