Zeid Raad al-Hussein, komisionieri i lartë i OKB-së për të Drejtat e Njeriut, tha një ditë më parë se Çekia po kryen shkelje sistematike të të drejtave të njeriut, duke i paraburgosur refugjatët gjer në 90 ditë dhe duke u kërkuar atyre të paguajnë për ndalimin e tyre.
Shqetësim tjetër sipas komisionierit paraqiste ligjërimi publik ksenofobik, ku mes të tjerash spikasnin deklarimet islamofobe të presidentit çek, Milos Zeman.
Të pajustifikueshëm e quajti al-Hussein ndalimin dhe të fëmijëve, ndërsa kushtet në godinat e ndalimit ishin shqetësuese.
Në deklaratën e tij lexohej,” Sipas raporteve të besueshme nga burime të ndryshme, shkeljet e të drejtave njerëzore të emigrantëve nuk janë as të izoluara, as të rastësishme, por sistematike. Ato duket të jenë pjesë integrale e një politike nga qeveria çeke, të projektuar për t’i shkurajuar emigrantët dhe refugjatët që të hyjnë në vend apo të qëndrojnë aty.”
Ndërkaq nuk ka vonuar të vijë dhe reagimi i zëdhënësit të presidentit çek, që i ka hedhur poshtë kritikat, duke kujtuar gjithashtu se, “Presidenti i përmbahet mendimit të tij dhe nuk do ta ndryshojë atë nën presionin nga jashtë.” /tesheshi.com/
