Është koha për të rënë dakord për një marrëveshje ndërkombëtare për pandemitë, tha Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus, në hapjen e një raundi të ri negociatash në të cilat Shtetet e Bashkuara nuk po marrin pjesë, raporton AFP.
Asnjë vend nuk do të jetë në gjendje të përballet vetëm me pandeminë e re, tha Ghebreyesus, tre ditë pasi SHBA njoftoi zyrtarisht se nuk do të merrte pjesë në negociata.
“Jemi në një moment vendimtar ndërsa përgatitemi të finalizojmë një marrëveshje për pandemitë për Asamblenë Botërore të Shëndetit” në maj, tha shefi i OBSH-së në hapjen e raundit të 13-të të negociatave në selinë e organizatës në Gjenevë.
“Është tani ose kurrë, me të vërtetë,” tha ai. “Por unë jam i sigurt se ju do të zgjidhni ‘tani’ sepse e dini se çfarë është në rrezik,” tha ai.
Mësime të vështira
Në dhjetor 2021, vendet anëtare të OBSH-së vendosën të bien dakord për një marrëveshje për parandalimin e pandemisë dhe gatishmërinë për të shmangur gabimet e mëdha nga pandemia COVID-19. Megjithatë, disa çështje të rëndësishme nuk janë zgjidhur ende, duke përfshirë shkëmbimin e të dhënave për patogjenët në zhvillim dhe përfitimet që vijnë nga kjo, përkatësisht vaksinat, testet, metodat e trajtimit dhe monitorimin e pandemisë.
“Ju mbani mend mësimet e vështira të Covid-19, i cili ka vrarë pothuajse 20 milionë njerëz” dhe “i cili vazhdon të vrasë,” tha Ghebreyesus. “Kjo është arsyeja pse ne jemi këtu: Për të mbrojtur brezat e ardhshëm nga pasojat e pandemive të ardhshme.”
“Nuk është çështja nëse do të ndodhë pandemia tjetër, por kur. “Dëshmia e kësaj është kudo rreth nesh: Ebola, virusi Marburg, fruthi, lija e majmunëve, gripi dhe kërcënimi i sëmundjes së radhës X”, shtoi kreu i OBSH-së. /tesheshi.com/
