Virusi Zika, i cili shkakton defekte tek të porsalindurit, e më rrallë paralizë tek të rriturit, ka gjasa të përhapet edhe në Evropë, bashkë me ardhjen e motit të mirë dhe ngritjen e temperaturave, edhe pse rreziku për një gjë të tillë është akoma i vogël.
Lajmi është bërë i ditur nga zyrtarët shëndetësor të OBSH (Organizata Botërore e Shëndetësisë).
Rreziku më i madh është në zonat me numër më të madh të mushkonjave, siç është bregu verilindor i Detit të Zi, transmeton Reuters.
“Shkalla e rrezikut nga përhapja e virusit dallon nga vendi në vend. Ftojmë vendet me rrezikshmëri më të madhe të përhapjes së këtij virusi, të ndërmarrin të gjitha masat e domosdoshme për parandalim”, – ka thënë Dr. Zsuzsanna Jakab, drejtoreshë regjionale e OBSH për Evropë.
Me masa të shtuara të kujdesit kuptohet zvogëlimi i mushkonjave të tipit Aedes, të cilat janë transmetues të këtij virusi si dhe trajnimi i institucioneve shëndetësore me qëllim të diagnostifikimit të hershëm të të prekurve nga virusi.
Mjekët nga OBSH kanë paralajmëruar se përveç mikorcefalusit dhe dëmtimeve të trurit tek të posalindurit, virusi Zika është shkaktar edhe i sindromës së rrallë neurologjike Guillian-Barré, i cili shkakton paralizë të përkohshme tek të rriturit. /tesheshi.com/
