Presidenti amerikan ka mbajtur një fjalë në një tubim të organizuar në përkrahje të Hillary Clinton-it, gjatë së cilës ai ka kritikuar rivalin e saj, Donald Trump-in, por edhe republikanët.
Të patolerueshme i ka quajtur Obama komentet fyese të Trump-it për femrat, duke u kërkuar republikanëve që të mos i japin më mbështetje kandidatit të tyre.
“Nuk ka kuptim për mua,” ka thënë Obama në tubimin në Karolinën e Veriut. “Ju nuk mund ta denonconi në mënyrë të përsëritur atë çka është thënë nga dikush e pastaj të thoni, ‘por unë ende do ta mbështes atë për të qenë njeriu më i fuqishëm i planetit’.”
Obama do t’u thoshte mijëra pjesëmarrësve në tubim: “Nuk duhet të jeni një baba apo një bashkëshort që të dëgjoni çfarë ne dëgjuam pak ditë më parë dhe të thoni se kjo nuk është e drejtë. Mjafton të jeni një njeri për të qenë për të thënë se kjo nuk është e drejtë.”
Ai e ka nxitur turmën ta japë përgjigjen e duhur në kutinë e votimit muajin e ardhshëm.
Nuk i ka kursyer kritikat presidenti amerikan dhe për ata republikanë që besojnë se Trump mund të ndryshojë.
“Ç’mendoni? Ai do të ndryshojë? Unë jam 55 vjeç dhe është e vështirë për mua të ndryshoj. Unë e di se është më e vështirë në të shtatëdhjetat.”
Shumë republikanë janë distancuar gjatë këtyre ditëve nga kandidati i tyre, duke mos e pranuar gjuhën e Trump-it. /tesheshi.com/
