Duke iu drejtuar sot tërë emocion një turme që kishte mbushur kompleksin e mbyllur sportiv në Najrobi, në kryeqytetin e Kenias, Obama nuk i kurseu fillimisht fjalët pozitive. “Jam këtu si president i një vendi që e sheh Kenian si një partner të rëndësishëm. Jam këtu si një mik i cili dëshiron që Kenia të ketë sukses.”
Me babanë e tij të lindur e të vdekur në Kenia, presidenti amerikan foli mbi përvojën e tij dhe të Kenias në pesë dekadat që nga pavarësia.
Më pas, në fjalët e tij u shpërfaq mënyra si ai i shihte kenianët, “Kur vjen puna te populli i Kenias, veçanërisht te rinia, unë besoj se nuk ka kufi në atë që mund të arrini.”
Obama u kujtoi gjithashtu vendasve të dyndur në tubim se ndërtimi i vendit dhe i ekonomisë kërkon përgjegjësi dhe përpjekje personale.
Toni i fjalës së presidentit mik u bë më serioz kur ai tha se, “Kenia është në një udhëkryq. Një moment i mbushur me rrezik të jashtëzakonshëm, por edhe me shpresë të jashtëzakonshme.”
Fjala e Obamës vijoi me ftesën për kenianët që të hiqnin dorë prej traditave të këqija, prej korrupsionit, ryshfetit, dhunës, trajtimit të keq të femrës.
“Korrupsioni nuk është unik për Kenian, por ekziston fakti se korrupsioni shumë shpesh tolerohet ngaqë ajo është mënyra si janë bërë gjërat ngahera. Vetëm pse diçka është pjesë e së shkuarës suaj nuk e bën atë të drejtë.”
“Trajtimi i femrave si qytetarë të dorës së dytë … këto janë tradita të këqija, ato duhen ndryshuar.”
Duke iu referuar përplasjeve etnike pas zgjedhjeve të diskutueshme të vitit 2007, në të cilat gjetën vdekjen 1200 persona, Obama u shpreh se politika e bazuar në etnicitetin ishte “e destinuar ta ndante një vend më dysh.”
Po sot, pas vizitës së tij të mirëpritur nxehtësisht në Kenia, Obama la Najrobin për të qëndruar në Adis-Abeba, në kryeqytetin e Etiopisë, si ndalesa e dytë e tij në turneun në Afrikën Lindore. Ndryshe kenianëve, etiopianët janë treguar më të ftohtë ndaj vizitës historike të presidentit amerikan në vendin e tyre. /tesheshi.com/
