Duke folur në një tubim në Majami në mbështetje të kandidates demokrate në zgjedhjet presidenciale amerikane, presidenti Obama e ka cilësuar si të rrezikshme këmbënguljen e Donald Trump-it se mund të mos e pranojë rezultatin e zgjedhjeve.
Për Obama-n, mbjellja e farës së dyshimit në mendjet e njerëzve për legjitimitetin e zgjedhjeve amerikane u jep një shtysë armiqve të SHBA-së.
“Ju po bëni punën e kundërshtarëve tanë, sepse demokracia jonë varet në vetëdijshmërinë e njerëzve se vota e tyre ka rëndësi,” tha presidenti në largim.
Në debatin e fundit televiziv, Trump nuk pranoi të pohonte se do ta njihte rezultatin e zgjedhjeve presidenciale, që zhvillohen në fund të javës së parë të muajit të ardhshëm. “Do t’u mbaj pezull,” premtoi ai.
E ndërsa fliste në Ohajo të enjten, Trump deklaronte buzagaz e me ironi se, “Do të doja t’u premtoja dhe t’u zotohesha të gjithë mbështetësve dhe votuesve të mi, e të tërë popullit të Shteteve të Bashkuara, se do t’i pranoj tërësisht rezultatet e këtyre zgjedhjeve të mëdha dhe historike presidenciale, nëse fitoj!” /tesheshi.com/
