Presidenti amerikan ka folur për BBC-në gjatë qëndrimit të tij në Londër. Ndër temat e diskutuara ka qenë dhe ajo e konfliktit sirian.
Ai e ka përjashtuar mundësinë që trupat tokësore të vendit të tij të dislokohen në Siri, duke deklaruar se ky do të qe një gabim.
“Do të qe një gabim për Shtetet e Bashkuara, apo për Britaninë e Madhe…, të dërgohen trupa tokësore dhe të rrëzohet regjimi i Esadit.”
Obama e quajti dëshpëruese situatën në Siri, e jashtëzakonisht të ngatërruar. I mendimit se vetëm përpjekjet ushtarake nuk mund t’i zgjidhin problemet e Sirisë, ai është shprehur se nuk ka zgjidhje të thjeshta për konfliktin në atë vend.
ISIS-i po ashtu, në pikëpamjen e presidentit amerikan, nuk ka për t’u mundur gjatë nëntë muajve të fundit të qëndrimit të tij në detyrë.
“Ne mund ta tkurrim dalëngadalë hapësirën në të cilën ata operojnë.” Kjo është ajo çka mund të bëhet, sipas Obamës. /tesheshi.com/
