Gjykata Themelore ka lëshuar një urdhërarrest për dy deputetët Albin Kurtin dhe Donika Kadaj – Bujupin, kjo pasi të dy nuk janë paraqitur në seancë. Ndërkohë, dy vetura të policisë po qëndrojnë para ndërtesës ku banon Kurti.
Gjyqtari i rastit, Beqir Kalludra thotë se deputetët e akuzuar nuk e kanë arsyetuar mungesën e tyre.
“Për të akuzuarit Albin Kurti dhe Donika Kadaj – Bujupi gjykata ka lëshuar urdhëresë për sjellje me detyrim, dhe sipas informatave të njëjtit nuk janë gjetur ne adresat e dhëna. Meqenëse të njëjtit nuk janë paraqitur, gjykata urdhëron arrestimin/ndalimin e tyre dhe dërgimin në Qendrën e paraburgimit”, tha gjyqtari.
Në seancë nuk është paraqitur as vetëvendosësja Albulena Haxhiu, por as deputetët e PDK-së Flora Brovina dhe Blerta Deliu si palë të dëmtuara, e as Bekim Haxhiu si dëshmitar.
Vetëm Faton Topalli është paraqitur në gjykatë. Ky i fundit ka thënë nuk e di pse nuk janë paraqitur kolegët e tij të partisë.
Në mungesë të tre të akuzuarve, seanca është shtyrë për afat të pacaktuar.
Katër deputetët e Vetëvendosjes akuzohen për përdorim të armës ose mjetit të rrezikshëm dhe pengim të personit zyrtar në kryerje të detyrës zyrtare. /tesheshi.com/
