Rusia ka ndaluar hyrjen e tetë zyrtarëve nga vendet e Bashkimit Evropian, në shenjë hakmarrje për sanksionet e BE-së të vendosura ndaj qytetarëve rusë, duke përfshirë dy zyrtarë nga Komisioni Evropian dhe Parlamenti Evropian.
Ministria e Jashtme e Rusisë tha se ZvPresidentja e Komisionit Evropian Vera Jourova dhe Presidenti i Parlamentit Evropian David Sassoli ishin midis zyrtarëve të ndaluar të hyjnë në Rusi.
Kryeprokurori i Berlinit Joerg Raupach është gjithashtu në listë, në përgjigje të një vendimi të BE të marsit që ndalon zyrtarët e lartë rusë të hyjnë në BE për shkak të rolit të tyre në burgosjen e liderit të opozitës Alexei Navalny.
Rusia ka kritikuar edhe një herë sanksionet e BE dhe ka akuzuar Brukselin për histeri anti-ruse.
“BE vazhdon politikën e saj të sanksioneve të paligjshme të njëanshme kundër qytetarëve dhe organizatave ruse,” tha ministria në një deklaratë, cituar nga Tass.
“Vetëm në mars 2021, gjashtë rusë ishin subjekt i kufizimeve të paligjshme të BE-së. Kjo praktikë është në kundërshtim me Kartën e KB dhe normat themelore të së drejtës ndërkombëtare. Përveç kësaj, media perëndimore po përhap me qëllim histerinë anti-ruse,” shtoi deklarata. /tesheshi.com/
