Për n/kryetaren e Kuvendit të Kosovës nga radhët e opozitës, posaçërisht Vetëvendosje-s, Aida Dërguti, Kuvendi i Kosovës po shndërrohet si i ai Koresë së Veriut, pa opozitë. Sipas saj, çdo vendim që mund të merret pa opozitën, është jolegjitim. Ndërsa sa për cilësimin që ambasadori amerikan u ka bërë akteve të opozitës si të “neveritshme”, ajo thotë se kjo ka të bëjë me aspektin estetik të çështjes e jo atë politik. Për znj. Dërguti, kjo që ndodhi të premten në Kuvendin e Kosovës, e bën më të nevojshme intensifikimin e protestave të opozitës kundër dyshes qeverisëse Mustafa-Thaçi
Intervistoi: Blendi Gashi
Sot opozita u suspendua nga punimet e Kuvendit. Ju përfaqësoni partitë opositare në Kryesinë e Kuvendit. A ishit në mbledhje kur u morr një vendim i tillë dhe si u arsyetua ai? A kanë marrë deputetët opozitarë vendim të shkruar apo jo për suspendim?
Sot unë nuk kam qenë e ftuar fare në mbledhje të Kryesisë së Kuvendit. Sidoqoftë, vendimi për suspendimin e deputetëve i marrë në Kryesi, është i jashtëligjshëm. Kryesia e Kuvendit është organ konsultativ, i cili përcakton rendin e ditës së seancës plenare. Çfarëdo vendimi për përjashtim të ndonjë deputeti, në bazë të rregullores në fuqi, mund ta merret vetëm gjatë seancës. Prandaj, vendimin për suspendim, Kryesia jua ka komunikuar mediave bashkë me emrat tanë, ndërkohë që ne nuk jemi njoftuar zyrtarisht.
Gjatë ditës së sotme u rikthyen arrestimet e deputetëve opozitarë. A po e thellohet edhe më tej kriza politike me këto arrestime ?
Sot deputetët e opozitës u dëbuan nga salla plenare duke u tërhequr zvarrë nga policët. Janë nëntë deputetë të arrestuar…
U raportua se është lënduar deputetja Albulena Haxhiu. A keni informata si është gjendja e saj dhe kush e lëndoi atë?
Albulena u lëndua nga policët të cilët e shtynë dhe me atë rast u rrëzua përtokë duke u lënduar në kokë. Aktualisht, Albulena ndodhet në spital, në pritje të ekzaminimeve të mëtejme të kokës.
Çfarë Kuvendi është ai i cili punon pa opozitën? Janë legjitime apo jo ato vendime që merren pa opozitën? A do ta pengoni sërish mbajtjen e seancave kurdo që thirren të mbahen ato?
Kuvendi i Kosovës pa opozitë i ngjason atij të Koresë së Veriut. Kjo qeveri antikushtetuese ka vendosur të vazhdoj punën me një Kuvend antidemokratik. Kjo strukturë që ka kapur të gjitha institucionet e shtetit, nuk duron kundërshtimin e opozitës. Të gjitha vendimet e Kuvendit pa prezencë të opozitës janë jolegjitime.
Ambasadori amerikan Delaëie veprimet e opozitës i ka quajtur neveritëse. Cili është komenti juaj? Po marrin anë amabasadorët?
Ky vlerësim duket të jetë bërë në një rrafsh estetik. Mund të mos jetë dukur e bukur seanca, megjithatë opozita ka një varg arsyesh të bëra tashmë publike pse detyrohet të veprojë në këtë mënyrë.
Ju në një emision keni deklaruar se opozita e sheh si mundësi edhe qëndrimin me javë të tëra para qeverisë. A ka diçka të re në këtë drejtim?
Protestat e përditshme po bëhen të pashmangshme. Këto institucione tashmë kanë humbur çdo legjitimitet të vazhdojnë punën.
Protestën e radhës e keni paralajmëruar me 27 shkurt. A pritni të keni edhe më shumë mbështetje qytetare?
Bazuar në zhvillimet e fundit, protesta mund të ketë edhe para kësaj date. Natyrisht që mbështetja do të vazhdojë, për sa kohë kjo qeveri antikushtetuese këmbëgul të qëndrojë në pushtet. /tesheshi.com/
