Agron Hoxha, një prej zyrtarve të KMSH-së i çështjeve të komunikimit publik, ka reaguar në lidhje me aktin e paprecedent të mbylljes nga ana e autoriteteve të sigurisë dhe atyre policore, të xhamisë historike së Et’hem Beut në qendër të Tiranës, me shkas Samitin e krerëve ushtarakë të NATO-s.
Prej një statusi të tij në FB, konfirmohet dhe akti tjetër i paprecedentë, ai i mosnjoftimit të KMSH-së, institucionit më të lartë përfaqsues të bashkësisë së besimtarëve myslimane, e po ashtu përgjegjës i kësaj xhamie dhe i shumë të tjerave. Sipas Hoxhës, dikush duhet të mbajë përgjegjësi për atë që ka ndodhur.
Ja ç’shkruan ai:
“Xhamia e Et’hem Beut, perla e qendrës së Tiranës sot në mëngjes. Dhjetra turistë që presin në radhë ta vizitojnë dhe shijojnë artin dhe trashëgiminë e kulturës shqiptare islame.
Dje ka qenë një ditë e trishtë, kur dikush nga instancat e sigurisë së vendit, në tejkalim të kompetencave dhe në kundërshtim me kushtetutën dhe çdo ligj të vendit, i pengoi njerëzit që t’i afroheshin kësaj xhamie për tu falur apo për ta vizituar.
Nuk ka asnjë arsye që mund ta përligj diçka të tillë. As takimi i NATO-s. Policia shqiptare ka mjaft kapacitete dhe mjete për të siguruar perimetrin e hotelit pa cenuar hyrjen në xhami.
Edhe më herët janë organizuar samite të rëndësishme dhe janë pritur delegacione me masa të larta sigurie, por xhamia e Et’hem Beut ka qëndruar përherë e hapur që prej Janarit të vitit 91 kur u hap për herë të parë pas komunizmit.
Dikush, që nuk denjoi as të njoftonte Komunitetin Mysliman paraprakisht me shkrim apo verbalisht, duhet të mbajë përgjegjësi…”, shprehet Hoxha, zyrtar pranë KMSH-së. /tesheshi.com/
