Kreu i Kishës Katolike Romake, Papa Françesku, paralajmëroi për rrezikun e reduktimit të marrëdhënieve njerëzore në “thjesht algoritme” dhe u kërkoi ligjvënësve të jenë vigjilentë kundër propagandës “partizane” dhe ndarjes në mediat sociale.
Në një fjalim para pjesëmarrësve të Rrjetit Legjislativ Katolik Ndërkombëtar, i cili po mbante konferencën e tij vjetore në Romë, Papa Françesku vuri në dukje se mediat sociale mund të jenë një mënyrë për të ndihmuar njerëzit të kuptojnë se ata janë pjesë e diçkaje më të madhe se vetja.
“Në të vërtetë, ky është qëllimi i deklaruar i shumë platformave të mediave sociale dhe sigurisht që shumë të mira po ndodhin përmes këtyre mjeteve të komunikimit”.
Megjithatë, shtoi Papa, duhet vigjilencë, “sepse, për fat të keq, shumë prirje çnjerëzore që janë rezultat i teknokracisë gjenden në këto media”.
Si shembull për këtë, ai përmendi përhapjen e qëllimshme të informacionit të rremë për njerëzit, lajmet e rreme dhe nxitjen e urrejtjes dhe ndarjes.
Më tej Francesku dënoi atë që ai e quajti “propagandë partiake dhe reduktim të marrëdhënieve njerëzore në algoritme të thjeshta”.
“Një rrezik tjetër në rrjetet sociale është ndjenja e rreme e përkatësisë, veçanërisht tek të rinjtë, e cila mund të çojë në izolim dhe vetmi”, tha Papa.
Si një rrugëdalje, Françesku mbrojti “një kulturë të takimit autentik, që përfshin një thirrje për të respektuar dhe dëgjuar njëri-tjetrin, duke përfshirë ata me të cilët nuk pajtohemi”. /tesheshi.com/
