Nga Blendi Gashi
Kuvendi i Kosovës vazhdon të jetë i bllokuar duke shënuar kështu një rekord krize. Që prej fillimit të sesionit vjeshtor, nuk është mbajtur asnjë seancë e rregullt pune, përjashtuar atë të improvizuarën në orët e vona, tek bar-kafeja e godinës, dy javë më parë. Ndërkohë që janë dhe dy seanca të tjera që i shpëtuan përbetimit opozitar për të mos lënë asnjë që të zhvillohet derisa të tërhiqet firma për Zajednicën dhe Demarkacionin me Malin e Zi, ato ku para deputetëve foli presidenti i Austrisë dhe Komisioneri i BE-së, Hahn.
Dhe, për të ofruar një rezyme, ja sa seanca ka zhvilluar Kuvendi i Kosovës që ka janari e deri më tani:
Sipas të dhënave të publikuara nga Instituti Demokratik i Kosovës, 61 seanca plenare gjithsej janë mbajtur në periudhën janar-nëntor 2015, ku maji dhe korriku kanë qenë më të ngarkuarit për ligjvënësit me nga 10 seanca secila.
Më pas është qershori me 8 seanca, pason prilli me 6, kurse në janar, shkurt, mars dhe tetor janë mbajtur nga 5 seanca. Në gusht deputetët janë mbledhur në Kuvend veç 3 herë, në shtator 2 herë dhe po kaq në muajin e tanishëm, nëntor.
Dhe ja cilët janë deputetët më të dalluar që nuk kanë lënë asnjë seancë t`u ikë:
Aliu Sadriu (LDK), Etem Arifi (PAI), Fadil Beka (PDK), Kujtim Paçaku (KNRP), Mexhide Mjaku-Topalli (PDK), Naim Fetahu (PDK), Sala Berisha – Shala (PDK), Shqipe Pantina (VV), Synavere Rysha (LDK), Time Kadrijaj (AAK), Xhevahire Izmaku (PDK), janë deputetët që kanë marrë pjesë 100 % në seanca deri më tani gjatë këtij viti.
Ndërsa Besnik Bislimi (VV), Fatmir Limaj (NPK), Jelena Bontic (SL), Jasmina Zivkovic (SL), Nuredin Lushtaku (PDK), Puhie Demaku (VV), Alma Lama (LDK), Agim Çeku (PDK), Ramiz Kelemendi (PDK), Safete Hadërgjonaj (PDK), Adem Hodza (KZG), Serdjan Popovic (SL), Slavko Simic (SL), Slobodan Petrovic (SL), Bojan Mitic (SL), janë deputetët që kanë munguar më shumë në seanca sipas KDI-së. /tesheshi.com/
