Figura e Adem Jasharit është nderuar edhe nga një komunë e madhe ne Stamboll. Një park modern në këtë vend është pagëzuar me emrin e tij.
Lajmi bëhet i ditur nga mediat kosovare sipas të cilave, kjo është një iniciativë nga Remzi Sheker nënkryetar i komunës Pendik, i cili është përkrahur edhe nga Kenan Shahin kryetar i kësaj komune.
Fadil Osmani zyrtar komunal i Gjilanit i cili për një kohë të gjatë ka ruajtur lidhjet me komunën Pendik tha se kësaj radhe është ftuar si mik special i Komunës Pendik.
Osmani tha se ishte ndjenjë e veçantë të shikoje tërë atë krenari që e kanë shqiptarët në Stamboll për emrin që tani e tutje do ta ketë ky park.
“Adem Jashari ishte sot i gjallë tek shqiptarët e Stambollit sepse të gjithë shprehën emocionet e tyre në momentin kur parku u pagëzua me emrin e tij”, tha Osmani.
