Rreth 1 milion persona, tha policia çeçene, morën pjesë në një marshim protestë në Grozny, kryeqytetin e Çeçenisë, kundër dhunës në Myanmar, ku trupat qeveritare të sigurisë po kryejnë vrasje dhe djegje në shkallë të gjerë ndaj pakicës myslimane Rohingya.
Në video shihen dhjetëra mijëra protestues duke vërshuar në shesh para xhamisë kryesore të qytetit, ndërkohë që zyrtarët çeçenë dhe udhëheqësit e komunitetit po i drejtoheshin turmës nga një skenë e improvizuar.
Presidenti çeçen Ramzan Kadyrov, përmes faqes së tij Instagram kishte kërkuar nga simpatizantët e tij që të mbështesin minoritetin e Myanmar të përbërë nga myslimanët. Ai po ashtu akuzoi liderat botërorë se kanë dështuar që të dënojnë atë, që ai e quajti “zhdukja” e Rohingyas nga vendi i tyre në Rakhinë.
“Kur u zhvilluan disa ngjarje në zyrën e një reviste të Parisit, mbretërit dhe presidentët, kryeministrat dhe ministrat dolën për të marrë pjesë në një marshim proteste,” shkroi ai duke iu referuar sulmit terrorist në revistën Charlie Hebdo në janar 2015.
“Në Myanmar, ushtria dhe banditët përdhunojnë, torturojnë dhe vrasin mijëra e mijëra njerëz vetëm pse janë myslimanë Rohingya, por figurat publike që marshuan në Paris nuk po shohin asgjë”, vijoi ai.
Të dielën, bashkësia muslimane e Moskës organizoi një protestë të ngjashme përpara ambasadës së Myanmarit.
Të paktën 800 njerëz morën pjesë në këtë ngjarje, sipas vlerësimeve të mediave.
Dhuna në Myanmar shpërtheu përsëri në fund të gushtit. Sulmet kryengritëse të Rohingya në një bazë ushtarake dhe reagimi i trupave të sigurisë rezultuan me të paktën 400 të vdekur.
Qeveria e Myanmarit akuzoi kundërshtarët e tyre për djegien e shtëpive dhe vrasjen e civilëve, por aktivistët e të drejtave të njeriut fajësojnë forcat qeveritare për këto incidente, si pjesë e një fushate që synon të largojë myslimanët Rohingya nga Rakhina.
Rreth 90,000 Rohingya kanë ikur nga dhuna përtej kufirit me Bangladeshin. Ekzistojnë rreth 1.1 milion njerëz që i përkasin pakicës etno-fetare që jetojnë në Myanmar dhe janë përndjekur nga qeveria e kombit, kryesisht aziatiko- budiste për dekada të tëra.
Fituesi i çmimit Nobel Aung San Suu Kyi, e përshkruar si një “ikonë e demokracisë” dhe “shpresa më e mirë” e Myanmarit në mediat perëndimore, ka dështuar që t’i japë fund persekutimit të Rohingyas që kur u bë Këshilltare Shtetërore e Shtetit në prill të vitit 2016. Kritikët thonë se Suu Kyi ushqeu konfliktin duke nxitur ndjenjat anti-Rohingya.
Ndër kritikët e dhunës në Myanmar është edhe Papa Françesku, i cili tha se “dënoj përndjekjen e pakicës fetare të vëllezërve tanë Rohingya”. Myanmar e ftoi Papën për një vizitë në muajin nëntor. /tesheshi.com/
