Tre oligarkë hebrenj të dyshuar për lidhje me presidentin rus Vladimir Putin kanë dhënë dorëheqjen nga një organizatë e madhe bamirësie që ata themeluan pasi u goditën nga sanksionet pas pushtimit rus të Ukrainës, sipas një deklarate nga grupi Genesis.
Michael Friedman, Peter Aven dhe German Hahn do të japin dorëheqjen nga rolet e tyre në Genesis Philanthropy Group (GPG), thuhet në njoftim.
“Për të lejuar grupin t’i qëndrojë besnik misionit të tij dhe të ndërtojë mbi themelet që kemi krijuar gjatë 15 viteve të fundit, të tre kanë dhënë dorëheqjen nga bordi,” tha grupi në një deklaratë.
Të tre burrat janë subjekt i sanksioneve ndërkombëtare për dyshimin se kanë lidhje me Putinin.
Friedman, i lindur në Ukrainë dhe një nga njerëzit më të pasur në Rusi, dhe Aven, i lindur në Rusi, kishin mohuar “ndonjë lidhje ekonomike apo politike” me Putinin.
Grupi GPG tha se ishte kryesisht duke u përpjekur të “forconte identitetin hebre midis hebrenjve rusishtfolës në mbarë botën dhe të promovonte mirëkuptimin midis hebrenjve që jetojnë në Izrael dhe diasporë”.
Grupi ka premtuar të paguajë 10 milionë dollarë për të ndihmuar hebrenjtë “të prekur nga kriza në Ukrainë”.
Kryetari i bordit të saj, Gennady Gazin, tha të premten se ai mbeti në detyrë dhe se dorëheqjet nuk do të ndikojnë në angazhimet e grupit Genesis.
Pushtimi rus i Ukrainës nxori në dritë lidhjet që hebrenjtë e pasur rusë dyshohet se mbanin me Vladimir Putin, si Roman Abramovich, i cili është subjekt i sanksioneve nga qeveria britanike.
Së fundmi, memoriali izraelit i Holokaustit, Yad Vashem, pezulloi bashkëpunimin me këtë oligark rus, i cili është një nga donatorët e tij më të mëdhenj.
Pas pushtimit të Ukrainës më 24 shkurt, Izraeli u kujdes që të mos dënonte ashpër sulmin rus, duke theksuar lidhjet e forta që e bashkojnë atë si me Moskën ashtu edhe me Kievin.
Presidenti ukrainas Volodymyr Zelensky pritet t’u drejtohet ligjvënësve izraelitë përmes videokonferencës të dielën. Vetë ky i fundit është me origjinë hebreje. /tesheshi.com/
