“Stadiumi i Uest Hemit është si një kthim në vitet 1970,” citon BBC-ja të jetë shprehur një ndjekës i takimit mes Uest Hemit dhe Çelsit, i vlefshëm për një të tetat e Kupës së Ligës në Angli.
Tifozeritë u përplasën nga fundi i ndeshjes, edhe pse qenë marrë masa më herët se të niste ndeshja. Shtimi i personelit mbikëqyrës, si dhe ndalimi i pijeve alkoolike, nuk e shmangën shkatërrimin e ndenjësve dhe hedhjen e tyre në kampin kundërshtar.
E papranueshme është cilësuar nga të dy klubet ajo që ndodhi mbrëmë; drejtuesit e Uest Hemit premtuan se do t’i identifikojnë personat që nxitën dhunën e do t’i dënojnë që të mos lejohen asnjëherë të hyjnë në stadium.
Duke iu kthyer takimit në fushë, Uest Hemi fitoi 2-1 ndaj Çelsit në një prej derbeve londineze. Kouyate dhe Fernandez do të shënonin në minutën e 11-të dhe të 48-të për vendasit, kurse goli i Cahill-it në minutën e 94-të thjesht qe ngushëllues për miqtë.
Kualifikimi i Uest Hemit është në vazhdën e rikthimit te rezultatet pozitive të një skuadre që vuajti shumë në nisjen e sezonit.
Në derbin e Mançesterit, buzëqeshja këtë herë qe për Mourinho-n, që fitoi për herë të katërt në 18 përballjet e tij me Guardiola-n. Për spanjollin, në anën tjetër, punët nuk janë dhe aq mirë: gjashtë ndeshje pa fituar, një gjë që nuk i ka ndodhur kurrë më parë.
Mançester Junajtedi zbriti me një formacion gati të pandryshuar në fushë, ndryshe Mançester Sitit, me shumë ndryshime. Junajtedi fitoi 1-0, falë golit të Mata-s në minutën 54-t.
Kualifikimi në Kupën e Ligës i jep mundësi Mourinho-s ta marrë paksa veten pas “ferrit” që po kalon në aventurën e re me “djajtë e kuq”.
Të kualifikuar në Kupën e Ligës janë gjithashtu dhe Arsenali, Njukasëlli, Liverpuli, Hall Siti, Lids Junajtedi e Sauthemptoni. /tesheshi.com/
