Nga Ylli Pata
Prej fillimit të tragjedisë së tmerrshme të popullit sirian, në Shqipëri, realisht nuk janë zhvilluar aktivitete apo tubime solidariteti në mbështetje të popullit dhe vendit që e lidhin shumë gjëra me Sirinë, duke u nisur nga diaspora e rëndësishme shqiptare qindravjeçare, por edhe lidhjet e tjera kulturore e historike.
Por këtë herë ka qenë një grua shqiptare, Xhilda Farwat, e cila është e martuar me një sirian dhe është nënë e tre fëmijëve, ka ndërmarrë një nisëm të fortë.
Një familje shqiptaro-siriane, jep një mesazh për ta dëgjuar shoqëria shqiptare që të zgjohet dhe të ketë më shumë shpirt, e ta harrojë për një moment poteren e shëmtuar të së përditshmes.
Zonja Farwat, ka mbledhur të gjithë komunitetin sirian që ndodhet në Shqipëri, kryesisht fëmijë dhe gra nga Siria, të cilët prej dy vitesh erdhën në vendin tonë, zhvilluan një aktivitet sensibilizues, që edhe shoqëria shqiptare të preket e të zgjohet për këtë tragjedi.
Organizatorja e aktivitetit ka ftuar edhe përfaqësuesit e komuniteteve fetare në Tiranë për t’ju lutur Zotit të gjithë së bashku që të pushojë ajo tragjedi e tmerrshme humane, dhe që një zë i fortë i kësaj lutjeje të dalë nga edhe Tirana.
“Të ndalojmë lotët për fëmijët sirianë dhe të ushqejmë ëndrrat e tyre. Nëse ndodh kjo edhe lotët e fëmijëve tanë do të jenë më të pakta”, thotë zonja Farwat, e cila si të gjithë sirianët e mbledhur në sallë, kanë pjesë të familjeve të tyre në Halep, Damask por dhe në vendet e tjera ku po ndodh tmerri.
Flasin me radhë përfaqësuesit e komunieteve fetare në vend dhe më pas flet një grua nga Damasku, e cila ka dy vjet në Shqipëri, e larguar nga tmerri i luftës.
“Pamjet që shohim çdo ditë po shokojnë botën e megjittatë asgjë nuk po ndodh”, thotë ajo duke ngashëryer.
Ndërkaq, më pas një grup fëmijësh sirianë këndojnë një këngë të dedikuar posaçërisht për bashkëmoshatarët që po vuajnë në atdheun e tyre.
“Vendi ynë është i vogël, ashtu si edhe ne, na sillni paqen të bashkohemi të gjithë”, janë fjalët që dridhen në zërin e tyre.
Këtu zonja, Farwat, organizatorja nuk i mban lotët: “Ndoshta është pak, por secili të japë pak nga energjia pozitive dhe nga vetje edhe në Shqipërinë tonë zëri bashkohet edhe me të tjerët dhe bëhet më i fortë”, thotë për tesheshi.com shqiptarja që është nëna e tre fëmijëve shqiptaro-sirianë. /tesheshi.com/
