Që stresi cilësohet si shkaku i të gjitha sëmundjeve, kjo nuk është një risi. Ajo që është ende e pasigurt dhe që nuk dihet, është si ta menaxhojmë, në mënyrë që të kemi një jetë të qetë. Sipas disa ekspertëve do të mjaftonte të kishim një dozë të vogël optimizmi, veçanërisht në momentet më dramatike, për të përmirësuar sistemin imunitar dhe si pasojë, për të përmirësuar kushtet shëndetësore.
“Emocionet pozitive dhe mënyra se si ato mund t’iu vijnë në ndihmë personave në momentet e stresit të madh, janë fenomene që shpesh janë lënë pas dore”, shpjegon Nancy Sin, nga universiteti shtetëror i Pensilvanisë në SHBA.
Studimi është bazuar në vështirësitë dhe sfidat që paraqiten në mënyrë të përditshme tek të rriturit dhe që kanë përparësi në uljen e sistemit imunitar. Kërkime të shumta kanë treguar se stresi dhe virozat janë dy faktorë të lidhur ngushtësisht mes tyre, por sipas rezultateve të këtij ekipi, niveli i stresit në trupin tonë nuk do të jetë aq i madh dhe nuk do të ketë të njëjtin ndikim në organizëm, në rast se reagojmë në mënyra të ndryshme.
Kërkuesit shpjegojnë se kur kalojmë periudha të shkurtra stresi, trupi ynë intensifikon automatikisht reagimin imunitar. Nëse periudhat e stresit janë të gjata, për shembull siç ndodh në rast se ne vuajmë nga një sëmundje kronike, ky lloj stresi mund të shkaktojë dëme me afat të gjatë, siç janë problemet e zemrës, obeszitet apo tumore të ndryshme.
Ekipi i Sin ka realizuar një eksperiment, i cili ka zgjatur rreth 8 ditë, gjatë së cilit shkencëtarët kanë monitoruar nivelin e stresit tek 872 individë gjatë një dite. Secilit prej të marrëve nën vëzhgim i është kërkuar që nëpërmjet telefonit të përshkruajnë gjendjen e tyre shpirtërore dhe nivelin e stresit.
“Kemi llogaritur rezultatet e pjesëmarrësve, duke analizuar reagimet e tyre në situata stresuese. Mund të themi të bindur se nëse rrini të qetë dhe ruani gjakftohtësinë, duke mos u prekur nga situatat stresuese, ju kontribuoni në zgjatjen e jetës suaj”,- ka thënë mjekja. /tesheshi.com/
