Nga Mensur Krasniqi
Pas shumë akuzave dhe kritikave në adresë të partisë shqiptare në pushtet BDI dhe liderit të saj Ali Ahmeti, si katalizator të gjendjes dhe pozicionit të tmerrshëm të shqiptarëve në Maqedoni, ka reaguar së fundmi zëdhënësi Bujar Osmani. Ai ka bërë një deklaratë të pazakontë me qëllim shfajësimin e partisë së tij, por duke e hedhur një akuzë të rëndë ndaj partnerit të koalicionit, VMRO dhe kreut Gruevski, për krizën politike në përgjithësi, dhe për gjendjen e shqiptarëve në veçanti. Osmani ka shpalosur një dëshmi tronditëse duke thënë se që nga vitit 2006 e deri më sot, Gruevski është përpjekur që të kthejë situatën e paraluftës së vitit 2001 në Maqedoni. Këtë e tha të enjten mbrëma gjatë një interviste televizive në emisionin “win-win” të Olivera Trajkovskës.
“Gjatë gjithë kësaj kohe VMRO-DPMNE ka tentuar të rikthejë situatën në periudhën e paraluftës së vitit 2001, si hakmarrje ndaj shqiptarëve për humbjen e pësuar në konfliktin e armatosur”, ka theksuar Osmani.
Sipas kësaj deklarate, ai ka lënë të nënkuptuar se VMRO-ja i ka tensionuar me qëllim marrëdhëniet ndëretnike, ku shqiptarët do revoltoheshin dhe, me mjete të dhunshme do t`i kërkonin të drejtat e tyre në Maqedoni, gjë që do të çonte drejt etiketimit të tyre si faktor destabiiluzues tek bashkësisë ndërkombëtare.
Nga ana tjetër, Mirjana Najçevska, njohëse e rrethanave politike, vlerëson se nëse qytetarët vërtetë vendosin për të ardhmen e tyre, Maqedonia tani nuk do të kishte nevojë për ndërkombëtarët. Ajo këtë koment e ka dhënë pas fjalimit të Gruevskit, i cili ka thënë se fati i shtetit është në duart e popullit.
“Qytetarët vlerësojnë se as institucionet e as strukturat e përgjithshme të shtetit nuk mundësojnë që qytetarët vetë të thonë çfarë mendojnë, çfarë ju duhet dhe t’i gjejnë mënyrat me të cilat do të përmbushnin nevojat dhe interesat e tyre. Ne nuk do të ishim në këtë gjendje dhe nuk do të kishte nevojë të kërkojmë ndihmë nga të huajt sikur qytetarët vërtetë vetë të vendosnin në Maqedoni”, tha profesoresha Mirjana Najçevska.
Dhe sipas Najçevskës, çdo hap i Gruevskit mund të përcillet me një kaos, madje edhe me një luftë civile me qëllim që t’ i shpëtojë dënimit.
Po ashtu edhe analisti politik maqedonas, Petar Arsovski vlerëson se VMRO-ja dhe Gruevski janë të gatshëm të paramendojnë edhe gjëra të tmershme kur bëhet fjalë rejtingu i tyre politik, e aq më shumë nëse kërcënohet siguria e vet Gruevskit.
“Mendoj që ende nuk kemi ardhur deri në një skenar të tillë, edhe pse nuk përjashtohet mundësia që VMRO-DPMNE në mënyra të ndryshme ta përmirësojë pozicionin e saj në prag të zgjedhjeve. Deri tash kemi pasur mundësi të shohim se janë shumë kreativ se çka nuk mund të paramendojnë vetëm e vetëm që të sigurojnë bazën e tyre politike. Nuk e di a nënkupton kjo luftë të menjëhershme qytetare, mirëpo gjithsesi nëse nuk implementohet Marrëveshja e Përzhinos, Maqedonia hyn në zonën e zezë, ku të gjitha skenaret janë të mundshme”, deklaroi për tesheshi.com, analisti politik maqedonas, Petar Arsovski. /tesheshi.com/
