SHBA dhe Serbia nënshkruan në ambasadën serbe në Uashington një Memorandum për Formimin e Këshillit të Biznesit Amerikano-Serb (ASBC).
Në nënshkrim morën pjesë ambasadori i Serbisë në SHBA, Marko Gjuriç, ambasadori i SHBA-së në Serbi, Christopher Hill, i dërguari special i SHBA-së për Ballkanin Perëndimor, Gabriel Escobar, si dhe përfaqësues të këtij këshilli biznesi.
Gjuriç tha se themelimi i Këshillit shënon fillimin e “një kapitulli të ri në partneritetin ekonomik të dy kombeve tona të mëdha”.
“Ai mishëron angazhimin tonë të përbashkët për të nxitur lidhje më të forta, për të promovuar tregtinë dhe investimet dhe për të avancuar mirëkuptimin e ndërsjelltë”, shkroi Gjuriç në Instagram.
Ambasadori i Serbisë në SHBA thotë se ky këshill biznesi do të shërbejë si platformë për bashkëpunim, dialog dhe inovacion, duke hapur mundësi të reja për avancimin e kompanive nga të dyja palët.
“Me nënshkrimin e Memorandumit të Mirëkuptimit ndërmjet Ambasadës së Republikës së Serbisë në SHBA dhe ASBC-së për promovimin e bashkëpunimit dypalësh ekonomik dhe afarist, ne ramë dakord që së bashku të promovojmë një kuptim më të mirë të praktikave dhe mundësive të biznesit dhe ekonomike në dispozicion të publikut në Serbi dhe SHBA”, ka shkruar ai.
Në të njëjtën kohë, ai falënderoi Gabriel Escobar, Christopher Hill, si dhe themeluesin dhe presidentin e ASBC, Eric Stewart dhe kryetarin e bordit të këtij këshilli biznesi, Stewart Jones.
Ambasadori amerikan në Serbi, Christopher Hill, tha në takim se niveli i shkëmbimit të shërbimeve ndërmjet Serbisë dhe SHBA-së “është rritur aq shumë sa Amerika është bërë partneri numër një kur bëhet fjalë për këtë lloj shkëmbimi”.
“Shtetet e Bashkuara dhe Serbia ndajnë një dashuri të përbashkët për shumë gjëra, përveç basketbollit që më vjen në mendje, është edhe biznesi dhe ideja se duhet të punojmë së bashku”, tha ambasadori amerikan, transmeton Zëri i Amerikës.
Gabriel Escobar vlerësoi se marrëdhëniet ekonomike mes Amerikës dhe Serbisë janë “një inkubator, qendër dhe katalizator që mund ta çojë përpara gjithë rajonin”, dhe shtoi se ai mund të jetë një nga pjesët më të rëndësishme të Evropës.
Ai gjithashtu theksoi se është i lumtur që kjo iniciativë vë në qendër të marrëdhënieve dypalëshe interesat e sektorit privat. /tesheshi.com/
