Mesila Doda, ish-deputete në legjislaturën e kaluar, ka reaguar sot përmes një komenti në rrjetet sociale në lidhje me nismën e kryeministrit Edi Rama për rishikimin dhe heqjen e dekoratave të dhëna për persona të ndryshëm, kryesisht ata të periudhës së komunizmit.
Nisma e Ramës është përfshirë në kalendarin 3 javor të punimeve të Kuvendit, ndërsa u mbajt në sirtare për muaj me rradhë me pretendimin e mungesës së votave nga mazhoranca PS-LSI.
Doda shkruan se antikomunizmi nuk është gargarë për të shpëlarë gojën. Është e detyrueshme pas asaj historie dramatike të vendit të përkushtohesh në një pakete ndarje historike me të kaluarën.
Reagimi i Mesila Dodës
O Zot, sa i pavërtetë je….
E propozuam heqjen e medaljeve tre vjet përpara, vrapove të depozitoje dhe ti një draft tjetër, i frigur se po të vidhnim një cope lavdie ku veç lavdi nuk kish, e pastaj i paralizove të dyja propozimet.
Dje të zuri sytë prapë e keqja që po rritet në këtë vend ku lavdia e diktaturës po te kthehet si flakurimë fytyrës për gjithë zhgënjimet që njerëzit pësojnë e për gjithë atë që po rrit heshtur çdo ditë ndër to….
Vrapove tek ligji i medaljeve përsëri, ashtu siç vrapoje tek çështja çame dikur e tani i ke harruar dhe emrin, ashtu si merr çdo pikë të programit tonë dhe e shet për tënden.
Do ta dish? Më vjen shume mirë që në fund fare përfundon të besh ato që kemi thënë ne, megjithëse me sa duket ne brenda mendjes tënde ishim armiku jot më i madh…
Më vjen shumë mirë se veç talentin, mendjen e përkushtimin me sa duket nuk e vjedh dot…
Po ta them megjithëse e di që nuk ke forca të besh sikur e kupton. Që të bësh gjëra të mira, duhet të kesh mendje e zemër, dhe të besosh…
Të besosh se çështja çame nuk është kot, e nuk është e përdorshme as për ca vota më shumë e as për të futur sherr e ndasi. Është vuajtje për ca njerëz, ndaj mos u tall me to kur njëherë bën si i përkushtuar e më pas i harron emrin.
Antikomunizmi nuk është gargarë për të shpëlarë gojën. Është e detyrueshme pas asaj historie dramatike të vendit të përkushtohesh në një pakete ndarje historike me të kaluarën.
Po të them dhe një tjetër e nuk do të them më që ke kryer plagjature. Mirato ligjin kundër propogandës komuniste, do i duhet këtij vendi. Por më shumë do i duhet një njeri i vërtetë, që i ndjen dhe përkushtohet në kauzat e mëdha e dramatike të këtij vendi. Ti i përdor, por nuk di as të përkushtohesh në parime e as të ndihmosh në zgjidhje. E kjo të bën të vogel, meskin e miop…. /tesheshi.com/
