Nëse politika do t’i përgjigjej apelit të presidentit Ilir Meta sot në Vlorë, do të duhej që së bashku me vitin e Sëknderbeut të niste edhe një vit reflektimi mbarëkombëtar për identitetin dhe memorien tonë historike. Pas ceremonisë së ngritjes së flamurit në sheshin e Flamurit, 105 vjet nga shpallja e shtetit shqiptar, liderët shtetërorë renditur sukseset e kombit dhe projektimet për të ardhmen në fjalimet që mbajtën në nisje të vitit të Skënderbeut.
Kryeministri Rama e mbajti fjalimin e tij me historinë e diasporës shqiptare duke theksuar se Shqipëria dhe Kosova duhet ta adresojnë diasporën si një të vetme.
“Diaspora shqiptare është një nga historitë më të mëdha të suksesit të vendit tonë për rolin kryesor që ka luajtur”, theksoi Rama, duke vënë në dukje se në mbledhjen e qeverive në Korçë është vendosur që palët të punojnë me të njëjtin komunitet.
Rama shpalli edhe logon zyrtare të vitit të Skënderbeut. “Ky vit mbarëkombëtar i Gjergj Kastriot Skënderbeut është një vit ardhmërie i fokusuar te konsolidimi i institucioneve dhe bashkëveprimi me shqiptarët kudo që ndodhen”, tha Rama.
Për presidentin Meta, viti 2018 do të jetë një reflektim mbarë kombëtar për memorien historike dhe identitetin tonë.
“Ky vit do të na përbashkojë më fortë të gjithë, në Shqipëri, Kosovë, në trojet shqiptare dhe në të gjithë diasporën”, u shpreh Presidenti Meta. Ndërsa presidenti i Kosovës, Hashim Thaçi tha se dita e Flamurit është “festa e krenarisë kombëtare, rimëkëmbja e ndërgjegjes sonë”. /tesheshi.com/
