Pas shkarkimit të kryeprokurorit Marko Zvërlevski qeveria e Maqedonisë ka paralajmëruar se nga e martja e javës së ardhshme pritet të nisë procedura për zgjedhjen e kryeprokurorit të ri.
Zëdhënësi i Qeverisë, Mile Boshnjakovski tha se propozimi i dalë nga Qeveria do t’i dorëzohet Kuvendit.
Më pas, Legjislativi shpallë konkursin për aplikimin e kandidatëve.
Këshilli i Prokurorëve do të japë mendim për secilin emër, pastaj, Qeveria përzgjedh vetëm njërin prej tyre, ndërsa kandidati zgjidhet në Kuvend.
“Prokurori Publik i ri do të jetë profesionist dhe me përvojë në fushën e jurispodencës, i pavarur dhe do të punojë për të mirën e qytetarëve”, tha Boshnjakovski.
Kjo proçedurë sipas gjitha gjasave nuk do të përfundojë para zgjedhjeve lokale që janë planifikuar të mbahen më 15 tetor.
Prokuror Publik i Maqedonisë përkohësisht do jetë Xhelal Bajrami, ish zv.ministër i Ministrisë së Punëve të Brendshme. /tesheshi.com/
