Kamerat dhe intervistat në vend zbuluan realitetin dramatik: e arrestoi policia, thjesht sepse donte t’i shpëtonte jetën fëmijës së vet! Ky qe, pak a shumë, thelbi i një lajmi tronditës këto ditë. Vijuan mallkimet për policinë katile, shtetin e pashpirt dhe OSSHE-n kriminele. Edhe kundërpërgjigjja nga ana e të akuzuarve nuk la gjë mangët… Në brendësi të lajmit… Fëmija 7-vjeçar vuante nga një formë e rëndë astme. Në momentet e krizave, djali i vogël trajtohej me ndihmën e një aparati, që punonte me korrent. Ndërkohë, OSSHE-ja ia kishte prerë dritat kësaj familjeje, prandaj babai i alarmuar shkon urgjent e bën rilidhje të energjisë. Policia e pikas menjëherë, e kap, e arreston dhe e fut në burg. Fëmija tanimë rrezikon seriozisht jetën… Pas lajmit… 1. Fëmijës iu ndërpre aparati i oksigjenit! Në fakt, aerosoli – ose inhalatori – nuk është aparat oksigjeni, por është një avullator. Përdoret zakonisht për trajtimin me avuj të thjeshtë solucioni fiziologjik, ose me përmbajtje medikamenti të caktuar, të bllokimit ose të sëmundjeve të rrugëve të frymëmarrjes. Gjendet lehtë në farmaci, është praktik dhe shumëkush mund ta ketë në shtëpi, sidomos për foshnjat, kur iu zihen hundët nga sekrecionet. A mund të thuheshin këto në media? Jo, sepse do të dukej diçka e rëndomtë, e qullët, pa efekt. Po sikur ta quajmë aparat oksigjeni, domethënë, si ata që u vënë pacientëve në gjendje kome apo duke dhënë shpirt? Po, kështu po! Kjo godet, kjo të fut dridhmat! 2. Sapo lidhi telat, babait i vunë prangat! Kështu tha zonja e shtëpisë. Nuk arriti të ndizte as dritat, as dushin, as lavatriçen, as sobën, vetëm aparatin vuri në prizë, por policia jote vigjilente dhe tepër e sofistikuar e fshatit, e nuhati përdorimin dy-tre minutësh të një aparati elektrik brenda mureve të shtëpisë së varfër. 3. Policia, në kundërshtim me ligjin, nuk lejoi vjedhjen! Prit! Tani ia futa unë kot, më duket! Ka ligj që lejon vjedhjen? Po, – mund të thotë dikush, – ka ligje që lejojnë vjedhjet e mençura ose vjedhjet e kokave. Kur vjedh fukarai, nxirret nga spitali, madje i merret edhe pompa e astmës (që të mos vrasë veten, pra, për qëllime sigurie, ashtu siç të heqin rripin e pantallonave!) dhe futet në burg; ndërsa kur vjedhin shefat, nxirren nga burgu dhe futen në spital, me pompë… Rrënjë… Ka qenë tregimi i një autori sovjetik, – me sa më kujtohet, – që legjitimonte një lloj vjedhjeje: atë të librave. Dhe ky tregim ishte pjesë e tekstit të leximit letrar, që bëhej dikur në shkolla. Me fjalë të tjera, fëmijë të dashur, ka vjedhje dhe vjedhje. Jo të gjitha janë haram. Ta ruajmë pronën e përbashkët socialiste si sytë e ballit! Kjo ishte parrulla. Por populli masivisht e lexonte: “Prona e përbashkët – prona e askujt”. Dhe kush të mundte, merrte aq sa mundte. Fshatari shkulte ‘pataten e përbashkët’ që kishte matanë gardhit, punëtori merrte një dorë gozhdë e bullona nga ofiçina, kuzhinieri nja dy kile mish, që ‘i tepronte’, shoferi një thes me çimento, kur shkarkonte, e kështu me radhë. Sigurisht, të gjithë ishin të justifikuar. Pse, vjedhje ishte të shkulje ca patate, kur nuk kishe bukë në shtëpi?! Po ca gozhdë e bullona, ç’dëm i sillnin fabrikës?! E ç’ishin dy kile mish, kur ishte therur një ka i tërë?!
Kështu, prona socialiste ushqeu një edukatë të re, atë të vjedhjes nga halli, vjedhjes pa qeder. ****** Por halli i sotëm, për shumë njerëz, është se ‘patate e përbashkët’ ka ngelur vetëm energjia elektrike. Në më shumë se njëzet vjet, vjedhja e energjisë u kthye në trimëri, pastaj mjeshtëri, dhe më vonë në art. Kush nuk bënte marifete me sahatin, ishte frikacak, i paaftë ose matuf. Kur vjedhin të gjithë, po ti, a mos je më i zgjuar?! Tani që është shtrënguar rripi, po përsosen arsyetimet për lejueshmërinë e vjedhjes së këtij malli të padukshëm. Kur vjedhin të gjithë, pse të mos vjedhim edhe ne?! Pastaj, pse vjedhje është kjo?! Ne nuk i bëjmë keq njeriu! Dhe arsyetimi më i fortë: “Jemi të papunë, kemi rroga të vogla, nuk na del hesapi, jemi me pension, shkurt, nuk kemi lekë!”. Si do t’i bëhet hallit, pra, kur populli kërkon legjitimimin e vjedhjes? A ka parti të gatshme sot, që të propozojë në parlament ligj të ri për lejimin e vjedhjes së energjisë elektrike? Po nga shoqëria civile apo institucionet fetare? Nuk e di.
I am really impressed together with your writing talents as neatly as with the structure for your blog. Is that this a paid theme or did you modify it yourself? Either way keep up the nice quality writing, it’s uncommon to see a great weblog like this one today!