I dërguari special i SHBA-së për Ballkanin Perëndimor, Gabriel Escobar, ka thënë sot në Beograd se sfida më e madhe për Serbinë është të bindë serbët nga Kosova që të kthehen në institucione dhe të marrin pjesë në zgjedhjet lokale në veri pa parakushte.
“Duhet të sigurohemi që ata që marrin pjesë në zgjedhje dhe kthehen në institucione të mirëpriten”, ka thënë Escobar në një bisedë me një grup gazetarësh në Beograd, transmeton Beta.
Shtetet e Bashkuara të Amerikës dhe Bashkimi Evropian po përpiqen të bëjnë presion shtesë, veçanërisht mbi kryeministrin e Kosovës Albin Kurti, për të zgjidhur tensionet e reja mes Serbisë dhe Kosovës që u përshkallëzuan në fund të majit kur 30 paqeruajtës u plagosën në përleshjet midis demonstruesve dhe forcave të KFOR-it.
Trazirat në veriun me shumicë serbe shpërthyen kur kryetarët shqiptarë, të shoqëruar nga Policia hynë në selitë e katër komunave, siç u takonte, pasi partitë serbe bojkotuan zgjedhjet në prill, në të cilat dolën vetëm 3.4 përqind e votuesve të regjistruar.
Presionet e SHBA-së dhe BE-së ndaj Serbisë dhe Kosovës
“Shpresojmë që kryetarët (shqiptarë) të mos i shfrytëzojnë ndërtesat komunale, që policia e Kosovës të tërhiqet dhe protestuesit të largohen nga zona”, tha Escobar.
I pyetur se cilat do të jenë pasojat për Prishtinën nëse nuk e pranon propozimin evropian për zgjidhjen e krizës në veri të Kosovës, Escobar tha se mospranimi i tij do të thotë t’i kthesh shpinën Evropës.
“Nëse nuk pranojnë, do të thotë se po largohen nga partneriteti euroatlantik”, tha ai.
Eskobar tha se formimi i bashkësisë së komunave serbe është ligjërisht i detyrueshëm për Qeverinë e Kosovës dhe se ajo duhet të formohet – me këtë apo me ndonjë qeveri të ardhshme.
“Është në marrëveshjen e Brukselit, në marrëveshjen e Ohrit, nuk është marrëveshje mes Kurtit dhe Serbisë, por mes Kosovës dhe Serbisë. Nëse Kosova dëshiron të përparojë në integrimet evropiane, duhet të formojë një komunitet të komunave serbe, pyetja është nëse kjo do të ndodhë me këtë qeveri apo me atë të ardhshme”, tha Escobar.
Lajçak dhe Escobar duhet të informojnë eprorët e tyre për përgjigjen e Kosovës dhe Serbisë deri të premten. /tesheshi.com/
