Rekordmeni i njohur shqiptar, Saimir Strati ka vendosur të mahnisë sërish. Këtë herë, ai ka nisur të punojë një mozaik me portretin e nobelistes shqiptare, Nënë Tereza dhe ka zgjedhur të përdorë kapëse teli, për krijim e imazhit të saj, në një dimension prej rreth 10 metrash katrorë. Portreti i humanistes së madhe do të shfaqet në Muzeun e Kosovës.
Vetë Strati ka thënë se ideja e përdorimit të kapëseve, simbolizon vuajtjet e refugjatëve për të kaluar kufinjtë me gjemba drejt vendeve evropiane, të cilat i paralelizon me misionin e Nënë Terezës për paqe.
“Dikur kam parë në televizor shpërngulje masive të refugjatëve nga Lindja e Mesme dhe nga lufta. Diku në një qytet të Evropës kishte disa tela me gjemba që i pengonin. Dhe, aty mendova se vetëm Nena Terezë mund t’i shpëtonte këta njerëz.
Atëherë u bë ideja ime për ta bërë Nënën Terezë dhe materiali tashmë ishte gjetur, pra për të punuar diçka me tel”, ka thënë artisti, Saimir Strati.
Ai ka sqaruar se për të përfunduar këtë vepër arti, do t’i duhet të përdorë mbi 1 milion e 500 mijë tela të bardhë dhe ngjyrë kafe. Në këtë mënyrë, sipas tij, mozaiku do të marrë një pamje tre dimensionale.
Për këtë vepër, Strati beson se do të fitojë edhe një rekord të ri në librin Guinness, ndërsa portreti pritet të përfundojë në fund të muajit nëntor./tesheshi.com
