Nga Bashkim Kastrati
Në qytetin e Klinës është mbajtur Forumi i diskutimit për dialogun ndërfetar në Kosovë, respektivisht për komunën e Klinës dhe të Istogut.
Qëllimi i këtij takimi ka qenë përforcimi i bashkëpunimit në mes komunave dhe liderëve fetarë. Sepse, më shumë se kudo në Kosovë, pikërisht aty është përcjellë brez pas brezi shembulli i së mirës së bashkëjetesës ndëfetare.
Komuna e Klinës, gjithmonë i ndarë në mënyrë të barabartë investimet për tre komunitet, atë mysliman, katolik dhe ortodoks, sipas nevojave që kanë patur, ku vend të veçantë kanë zënë objektet e kultit.
Andrea Behm, drejtoreshë e OSBE-së, për rajonin e Pejës, tha se takimi i shërbeu vlerësimit të kësaj dukurie pozitive.
“Ky është Forumi i pari për Klinën dhe Istogun, për vitin 2015. OSBE tani është përqendruar në dialogun ndërfetar, ku janë shënuar rrritje dhe ne si OSBE do t`i mbështesim vazhdimisht. Prandaj ne sot do të shohim se si komunat i kanë integruar këto forume ndërfetare”, tha Behm.
Nënkryetari i Komunës së Klinës, Enver Berisha, ka përshëndetur një organizim të tillë dhe ka thënë se dialogu ndërfetar dhe institucionet janë dy faktor që u prijnë komunave, dy elementë mjaft të rëndësishme të integrimeve tona të brendshme, sa i përket tolerancës bashkëpunimit dhe bashkëjetesës.
“Përgjegjësit dhe obligimet që i ka pushteti lokal për trajtimin e këtyre temave, ne me punën tonë dhe bashkëveprimet që i kemi edhe me institucionet fetare, përveç takimeve që kryetari i ka me komunitetet fetare, ne e kemi edhe Këshillin për Siguri ku mbahen mbledhjet e rregullta dhe pjesëmarrës të rregullt janë komunitete mysliman dhe ai katolik, ndërsa komunitetin ortodoks e përfaqëson Shefi i Zyrës për Komunitet që i takon komunitetit ortodoks”, tha Berisha.
Ndërsa imami i Klinës, Fitim Bojaj, ka thënë se bashkëpunimi me komunën e Klinës është në nivelin më të lartë që mund të ekzistojë.
“Gjithmonë dyert i kemi të hapura për çdo kërkesë apo ankesë. Sa i përket aspektit fetar na kanë lakmi të gjithë, sepse vazhdimisht me kishën katolike kemi takime, si dhe bashkëpunim shumë të mirë. Ndërsa me përfaqësuesit e kishës ortodokse, sot për herë të parë po takohem”, tha ai. /tesheshi.com/
