Negociatat mes Rusisë dhe SHBA-së, me qëllim përmirësimin e marrëdhënieve mes dy vendeve dhe zgjidhjen e konfliktit në Ukrainë, u mbajtën të martën në kryeqytetin e Arabisë Saudite, Riad.
Bisedimet mes dy delegacioneve për përfundimin e luftës në Ukrainë kanë zgjatur katër orë e gjysmë. Delegacioni amerikan udhëhiqej nga Sekretari i Shtetit Marco Rubio, ndërsa ai rus nga ministri i Jashtëm Sergei Lavrov.
Negociatat u mbyllën pas një drekë pune, të organizuar pas pjesës së parë të bisedimeve, të cilat po zhvillohen në një nga pallatet e familjes mbretërore në kompleksin Albasatin.
Agjencia e lajmeve Interfax citoi negociatorin rus Yuri Ushakov të ketë thënë se bisedimet shkuan mirë dhe se u diskutuan kushtet për një takim midis Presidentit Donald Trump dhe Vladimir Putin, raportoi Reuters.
Ushakov tha se nuk ka gjasa që samiti të mbahet javën e ardhshme. Por bisedimet në kryeqytetin saudit theksuan ritmin e shpejtë të përpjekjeve amerikane për t’i dhënë fund konfliktit, më pak se një muaj pasi Trump mori detyrën dhe gjashtë ditë pasi ai foli me telefon me Putinin.
Departamenti i Shtetit njoftoi se Rubio dhe Lavrov ranë dakord të caktojnë ekipe të nivelit të lartë që do të fillojnë punën për një zgjidhje të shpejtë të konfliktit në Ukrainë, si dhe do të diskutojnë bashkëpunimin ekonomik. Po kështu, Rubio tha se të dy vendet kanë rënë dakord të fillojnë aktivitetet për rivendosjen e funksionalitetit të misioneve të tyre diplomatike në Moskë dhe Uashington.
Por ndërsa takimi ishte ende duke vazhduar, Rusia sinjalizoi një shtrëngim të kërkesave të saj.
“Nuk mjafton” të mos pranosh Ukrainën në NATO
Zëdhënësja e Ministrisë së Jashtme Maria Zakharova u tha gazetarëve në Moskë se “nuk mjaftonte” që NATO të mos pranonte Ukrainën në anëtarësim. Ajo tha se aleanca duhet të ecë përpara, duke hedhur poshtë premtimin e bërë në takimin e nivelit të lartë të Bukureshtit të vitit 2008 se Kievi do të bashkohej në të ardhmen, në një datë të papërcaktuar.
Ajo shtoi se në të kundërtën ky problem do të vazhdojë të rëndojë atmosferën në kontinentin evropian.
Kremlini, megjithatë, deklaroi se është e drejta sovrane e Ukrainës të vendosë nëse do të anëtarësohet në Bashkimin Evropian dhe se Moska nuk ka ndërmend t’i diktojë Kievit se si duhet t’i qaset çështjes, por se ky nuk është rasti me anëtarësimin në ndonjë aleancë mbrojtëse apo ushtarake.
Nuk pati asnjë reagim të menjëhershëm nga anëtarët e NATO-s apo SHBA.
Negociatat filluan pa përfaqësues të Ukrainës dhe më herët presidenti ukrainas Volodymyr Zelensky tha se ai nuk kishte ndërmend të njihte asnjë marrëveshje në të cilën Ukraina nuk ishte një nga palët në negociata, transmeton Anadolu.
Në takim morën pjesë ministri i jashtëm rus Sergei Lavrov dhe Yuri Ushakov, një ndihmës i lartë i presidentit rus Vladimir Putin, i cili do të takohet me Sekretarin e Shtetit të SHBA Marco Rubio, Këshilltarin e Sigurisë Kombëtare Mike Waltz dhe të dërguarin për Lindjen e Mesme Steve Witkoff.
Përfaqësuesit e dy vendeve patën kontakte joformale para fillimit të raundit kryesor të negociatave, tha Kirill Dmitriev, kreu i Fondit të Investimeve Direkte Ruse dhe anëtar i delegacionit rus.
Ai vlerëson se kompanitë amerikane kanë humbur më shumë se 300 miliardë dollarë duke u tërhequr nga tregu rus.
Një burim i afërt me diplomatët rusë përmendi heqjen e sanksioneve si një nga temat.
Evropa po shqyrton dërgimin e ndihmës shtesë në Ukrainë
“Gjetja e zgjidhjeve të përbashkëta ekonomike dhe shtigjeve pozitive është jashtëzakonisht e rëndësishme, veçanërisht për SHBA-në dhe shumë vende të tjera që gjithnjë e më shumë e kuptojnë se tregu rus është jashtëzakonisht tërheqës dhe se është e nevojshme të jemi të pranishëm”, tha Dmitriev.
Zëdhënësi i Kremlinit Dmitry Peskov tha të hënën se takimi do të fokusohet në marrëdhëniet dypalëshe midis Rusisë dhe Shteteve të Bashkuara, përgatitjet për negociatat për zgjidhjen e konfliktit ukrainas dhe një takim të mundshëm midis presidentëve të dy vendeve, Vladimir Putin dhe Donald Trump.
Arabia Saudite u zgjodh si vendi i negociatave sepse u përshtatet të dyja palëve, tha Peskov, duke shtuar se është ende herët për të folur për pjesëmarrjen evropiane në bisedimet e paqes për Ukrainën.
Gazetarja e Al Jazeera-s, Yulia Shapovalova, tha më parë se ky takim do të shërbente si një rrugë për një takim vendimtar midis Presidentit Trump dhe Presidentit Putin.
Pasi vendet evropiane u përjashtuan nga negociatat, presidenti francez Emmanuel Macron organizoi një samit në Paris. Tre vende evropiane kanë konfirmuar se janë të gatshëm të dërgojnë trupa në Ukrainë nëse arrihet një marrëveshje paqeje.
Përveç kësaj, sot u njoftua se Bashkimi Evropian do të shqyrtojë mundësinë e dërgimit të ndihmës ushtarake shtesë në Ukrainë në vlerë prej pesë miliardë euro në të ardhmen e afërt.
Duke cituar një raport të Radio Liberty, ushtria ukrainase shkroi në faqen e saj të internetit se blloku synon të dërgojë në Ukrainë 1.5 milionë predha artilerie të kalibrit të madh, sisteme të mbrojtjes ajrore, raketa precize me rreze të gjatë dhe mjete ajrore pa pilot.
Ndihma do të përfshijë gjithashtu mbështetjen për rindërtimin e brigadave ushtarake, duke përfshirë trajnimin dhe pajisjet ushtarake, tha ai.
Që nga fillimi i luftës në vitin 2022, Bashkimi Evropian ka dhënë 134.5 miliardë euro ndihmë për Ukrainën, duke përfshirë 48.5 miliardë euro ndihmë ushtarake. /tesheshi.com/
