Nuk do të ketë seancë parlamentare ditën e sotme, pasi vijojnë negociatat intensive mes ambasadorëve të rëndësishëm në Tiranë dhe kreut të Partisë Demokratike, Lulzim Basha.
Me pretekstin se deputetët ndodhen në Francë për të parë kombëtaren, mësohet se kryetari i Kuvendit, Ilir Meta, ka vendosur që kjo e enjte të mos jetë ditë seancash plenare.
Megjithatë, burime pranë kryesisë së Kuvendit bëjnë me dije se Meta dhe disa ambasadorë të rëndësishëm të vendeve të BE-së do të vazhdojnë negociatat me Partinë Demokratike që kjo e fundit të bëhet pjesë e miratimit të reformës për drejtësi.
Një delegacion prej tre diplomatësh, i përbërë përkatësisht nga ambasadori i Francës, Fitoussi, ambasadori i Hungarisë, Antal Heizer, si dhe nga një përfaqësues tjetër i rëndësishëm i shteteve të BE-së, por që nuk i bëhet i ditur emri dhe vendi, kanë zhvilluar dje një takim për më shumë se një orë me liderin e opozitës, Lulzim Bashën.
Siç mësohet, diplomatët kanë negociuar për mënyrën e bërjes së pranueshëm për të dyja palët të të ashtuquajturit neni 88.
Qëllimi është që të arrihet në një pakt me një skemë të tillë ku PD të mos ketë përfaqësim profesional në komisionin e verifikimit të gjyqtarëve, por në komisionin e apelimit.
Në një deklaratë të bërë pak ditë më parë nga Korça, ambasadori i BE-së në Tiranë tha se, “Reforma në drejtësi është çështja numër një për nga rëndësia për të ardhmen e vendit tuaj. Basha dhe ambasadorja Vlahutin kontaktojnë çdo ditë me njëri-tjetrin. Jam i sigurt se BE-ja është shumë objektive në çështjen me Shqipërinë. Për të qenë më të qartë lidhur me këtë deklaratë, pyesni vetë zotin Basha. Ajo që dua të theksoj është se Shqipëria krijoi në një kohë të shkurtër mundësinë për ndryshimin e sistemit të drejtësisë. A e imagjinoni dot se si një vend kaq i vogël krijoi mundësinë e një ndryshimi të tillë? Është rezultat i madh të jesh pranë votimit, ndaj e rëndësishme është që partitë të kenë sensin pozitiv ndaj kësaj gjëje. Është normale që çdo parti të ketë rezervat e saj ndaj ligjit, por ato duhet të tregohen pozitive, dhe do ta gjejnë zgjidhjen.”
Ambasadori i Hungarisë është zgjedhur si negociator pasi ai ka raporte të mira me ish-kryeministrin Berisha, i cili nga ana e tij, kur ishte shefi i qeverisë, kishte raporte të ngushta me kryeministrin hungarez, Victor Orban.
Ky i fundit ka patur më shumë se një herë përplasje me BE-në pas ndryshimit të Kushtetutës së vendit të tij, dhe mësohet se Berisha ka shprehur përkrahje për modelin hungarez të përbërjes së institucioneve të drejtësisë.
Pikërisht nisur nga këto raporte, ambasadorët e vendeve anëtare të BE-së kanë rënë dakord që të zhvillojnë një raund të ri negociatash, ku pjesë e tyre të jetë dhe ambasadori i Hungarisë. Bashkë me ambasadorët, në hartimin ligjor të propozimeve marrin pjesë dhe dy ekspertë të misionit Euralius.
Mësohet se pas takimeve me Bashën, diplomatët kanë zhvilluar bisedime me kreun e Komisionit të Reformës, Fatmir Xhafën, që njoftohet se u ka bërë të ditur atyre se ndryshimet e amendamenteve mund të bëhen ose gjatë Këshillit të Legjislacionit, ose në seancë, mjafton që të ketë një dakortësi politike.
Në fakt, edhe PD-ja është vënë në vështirësi, pasi ka gjasa të forta për një përçarje të saj në prag të votimit. Një ish-ministër i PD-së, Arjan Starova, ka kritikuar në një koment në shtyp qëndrimin antiamerikan të Partisë Demokratike. /tesheshi.com/
