Mund të thuhet se Shqipëria ka bërë pis NATO-n me kanabis, pasi së fundi janë gjetur dhe asgjesuar 125 rrënjë sosh të kultivuara në një repart ushtarak në Zall Herr.
Për këtë rast të paprecedent, tre ushtarakë kanë rënë në pranga, të cilët janë:
Gramoz Mullai, 52 vjeç, me detyrë Shef Seksioni i Sigurisë;
Rustem Koçi, 25 vjeç, me detyrë Specialist për Zbulimin;
Gentian Zhurda, 45 vjeç, me detyrë Specialist Sigurie.
Në një reagim, me një gjuhë të drunjtë, ministri Peleshi tha se ka urdhëruar pezullimin nga detyra të të arrestuarve:
“Bashkëpunimi mes Policisë së Shtetit dhe Policisë Ushtarake, bëri të mundur evidentimin dhe më pas asgjësimin e 125 bimëve kanabis, të cilat ishin kultivuar në një zonë të pyllëzuar, në territorin e zonës ushtarake të Zall Herrit. Menjëherë janë pezulluar nga detyra të gjithë personat përgjegjës. Dënojmë me forcë çdo aktivitet të kundërligjshëm. Inkurajojmë organet ligjzbatuese të bëjnë detyrën në çdo rast!”
Ndërsa kryeministri ka zgjedhur të merret me një tjetër Zall.
“Ja transformimi i qendrës shëndetësore në Zall-Mner, Kamëz, që tani ka hapur dyert për banorët e zonës”, shkruan Rama, duke zgjedhur të promovojë Shqipërinë tjetër. /tesheshi.com/
