Një numër i konsiderueshëm i nxënësve të shkollave të mesme në Shkup, diku rreth dy mijë, bllokuan qendrën e qytetit, respektivish rrugët kryesore, në shenjë revolte kundër reformave në arsimin e mesëm, me të cilat provimi i lëndës së Matematikës bëhet i obligueshëm në maturën shtetërore.
Nxënësit kishin shkruar një parullë të madhe: “Stop reformave të këqija”, të cilin e kishin kthyer kah Kuvendi, ndërsa mbanin edhe pankarta me mbishkrime “Nuk na duhet matematika”, “Ligjet nuk ndryshohen brenda nate” etj.
Në protestë ishin nxënës nga vetëm dy gjimnaze, pasi siç na thanë, në shumë shkolla nxënësve u ishin mbyllur dyert, për t`i penguar të dalin në protesta.
Drejtori i gjimnazit “Cvetan Dimov” në Shkup, Shaip Zeneli, i pyetur të komentojë akuzat, na tha se nxënësit janë të manipuluar, pasi në marrëveshjen që është aritur mbrëmë, parashihet tërheqja e matematikës si lëndë e obligueshme, përveç në gjimnazet Matematiko-Natyrore.
“Ne u’a kemi spjeguar këtë nxënësve , dhe si rrjedhojë, ata nuk kanë dalur në protesta” tha Zeneli. /tesheshi.com/
