Në samitin e Vjenës pritet të mos paraqitet projekti për ndërtimin e hekurudhës mes Shqipërisë dhe Kosovës, projekt që ka zënë goxha vend në fjalimet e liderëve të të dyja vendeve ndërsa promovonin lidhje më të ngushta ekonomike.
Mediat në Prishtinë thonë se Tirana synon që më parë të ndërtojë linjë hekurudhore me Maqedoninë, ndërsa atë me Kosovën nuk e ka në planet e saj afatshkurtëra.
Projekti nuk do të zërë vend as në diskutimet e samitit të Vjenës, ku liderët ballkanikë janë ftuar të paraqesin planet e tyre zhvilllimore dhe të ndërtojnë ura bashkëpunimi.
Për hekurudhën mes Shqipërisë dhe Kosovës është folur edhe gjatë këtij viti, ndërsa zyrtarët kanë dhënë premtime për të siguruar mbështetje financiare edhe nga Bashkimi Europian.
Por, deri më tani, mungon një studim fizibiliteti për të përcaktuar edhe koston e projektit dhe sigurimin e fondeve.
Pas lidhjes përmes autostradës Durrës – Morinë – Merdar, Kosova është e gatshme të ketë një lidhje tjetër me Shqipërinë nëpërmjet një linje hekurudhore si mënyrë për të ulur edhe më shumë koston e transportit.
“Ne kemi biseduar me autoritete nga hekurudhat e Shqipërisë, që të riaktualizojmë, t’i shtrojmë çështjet në tavolinë, t’i shohim me ekspertët, ta shohim fizibilitetin dhe cilat janë mundësitë dhe burimet financiare. Qeveria e Kosovës, shteti i Kosovës është shumë i interesuar për t’u lidhur me Shqipërinë edhe me hekurudhë”, thotë Agron Thaçi, drejtor i Hekurudhave të Kosovës për radion Evropa e Lirë.
Megjithatë, sipas tij, kjo gatishmëri duket vështirë e realizueshme për shkak të kostos financiare, terrenit të papërshtatshëm dhe gjatësisë së hekurudhës në shtetin shqiptar. /tesheshi.com/
