Nga Mensur Krasniqi
Të gjithë ata që kanë planifikuar të ndërtojnë shtëpi në Maqedoni, tani më nuk kanë pse t’mendojnë për shpenzimet e projektit, ngase Ministria e Transportit dhe Lidhjeve këto projekte jua ka hartuar falas.
Këto projekte prej sot mund të merren nga faqja ueb e ministrisë në fjalë: ëëë.mtc.gov.mk. Me këtë masë qeveritare mundësohet subvencionim prej 900 deri 2.000 euro për çdokënd që vendos të ndërtojë një banesë të re për të jetuar.
“Projekt do të fitojë secili që është i interesuar dhe nuk ka kufizim në lokacionit për ndërtim”, informoi në një konferencë për shtyp ministri dikasterial, Vlado Misajlovski.
Përmes konkursit publik, Ministria e Transporti ka gjetur zgjidhje ideore me projekt të përpiluar për gjashtë lloje objektesh me sipërfaqe të ndryshme.
“Bëhet fjalë për projekte të përpiluara të gatshme për shtëpi në të cilat janë vendosur të gjitha fazat e ndërtimit: statistikë, elektrikë., makineri dhe mbrojte zjarrfikëse. Projektet janë për ndërtim të shtëpive individuale me sipërfaqe prej 60, 80, 100, 120, 150 dhe 180 metra katrorë”, tha Misajlovksi.
Krahas uljes së shpenzimeve për ndërtim, theksoi ministri, me këtë masë do të ulen afatet për nxjerrjen e lejes për ndërtim, për shkak se projektin veçmas e di komuna që e ka dhënë lejen e ndërtimit.
“Kjo do të thotë se secili që dëshiron të ndërtojë shtëpi si shembull nga ky lloj, do të mund që nga Ministria e Transportit të marrë projekt të gatshëm dhe me të të parashtrohet miratimi për ndërtim. Vetëm investuesi do të duhet të përpilojë elaborat gjeodezik”, sqaroi Misajlovski duke theksuar se ekziston edhe mundësi të bëhet korrigjim i projektit themelor varësisht nga dëshirat personale dhe nevojat e investuesit.
Sipas Misajllovskit, me masën për subvencionimin e projekteve nuk dëshirojnë t’u bëjnë konkurrencë shtëpive projektuese, por t’u ndihmojnë qytetarëve të cilët dëshirojnë të kursejnë gjatë ndërtimit.
Kjo masë do ishte mirë të merrej në Shqipëri, jo aq për t`u ardhur në ndihmë atyre që vendosin të ndërtojnë, por për t’u diktuar projekte më të përshtatshme në varësi të vendit ku ndërtojë. Një ndër problemet e situatës urbane në Shqipëri, është se çdokush jo vetëm ka ndërtuar ku të mundet, por dhe me projekte pa asnjë kufizim e të nxitura nga lloj-lloj trillesh , duke e bërë mish-mash imazhin urban të vendit. /tesheshi.com/
