Anne Hidalgo, kryebashkiakja e Parisit, ka njoftuar sot se autoritetet vendore po planifikojnë të ndërtojnë një kamp për refugjatët. Ky kamp, i pari i tillë zyrtar për refugjatët në Paris, do të hapet brenda gjashtë javësh, për t’u bërë strehë të gjendurve në kushte të mjerueshme.
“Kemi identifikuar një sërë vendesh në veri të Parisit, ku mund të krijojmë një qendër…në përputhje me kushtet e OKB-së,” ka bërë të ditur Hidalgo.
“Nuk mund të pranojmë më situata humanitare,” deklaroi në një konferencë shtypi kryebashkiakja, por duke mos e bërë të njohur njëkohësisht vendin e saktë ku do të ngrihet kampi.
Struktura pritëse për refugjatët do të ndërtohet shpejt, sipas saj, por do t’i ketë të gjitha kushtet e nevojshme.
Hidalgo iu referua si shembull një kampi të ngritur në mars në Grand-Synthe, në bregun verior francez. Ai kamp administrohet nga Mjekët pa Kufij, e është kampi i parë i refugjatëve në Francë i njohur ndërkombëtarisht.
Franca është prekur shumë më pak nga kriza e refugjatëve se vende si Gjermania, por mijëra njerëz e kanë shfrytëzuar atë si pikë kalimi për të arritur në Britani. /tesheshi.com/
