Venus dhe Serena Williams janë dy finalistet e turneut të tenisit Australian Open. Një finale e cila i vë rishtas përballë dy motrat pas 14 vitesh në të njëjtin Grand Slam.
Venus, 36 vjeç, humbte asokohe në finale, për të mos e fituar asnjëherë këtë turne. Të shtunën do të jetë mbase mundësia e fundit për ta mbajtur në duar trofeun e Australian Open-it.
E motra, Serena, një vit më e vogël, fitonte 2-1 në atë finale; gjashtë herë është ajo fituese e këtij turneu.
Në gjysmëfinalet e ditës së sotme, Venus Williams mposhti 2-1 një tjetër amerikane, Coco Vandeweghe. Shumë më të lehtë e pati Serena Williams ndaj kroates Mirjana Lucic-Baroni, duke fituar 2-0.
Nëse Venus fiton të shtunën në finale, ky do të ishte i teti Grand Slam i fituar prej saj, dhe i pari që nga Wimbledon-i në vitin 2008.
Për Serena-n, në rast fitoreje, do të ishte trofeu i 23-të i siguruar në turnetë Grand Slam, një rekord për tenisin e sotëm.
“Eshtë e pabesueshme ta shohësh Serena-n të luajë tenis, mënyrën si e godet topin dhe sa konkurruese është. Do të jetë një ëndërr ta shoh atë të shtunën në anën tjetër të rrjetës,” ka qenë reagimi i Venus-it pasi kaloi në finale.
“Jam vërtet krenare për Venus-in, ajo është një frymëzim i plotë. Eshtë kundërshtarja ime më e fortë. Asnjë nuk më ka mundur aq sa Venus-i. E di se një Williams do ta fitojë këtë turne,” është reagimi i së motrës. /tesheshi.com/
