Pasi u zgjodh presidenti i 45-të i Shteteve të Bashkuara, Donald Trump duket se ka nisur të shndërrohet në “presidencial” ashtu si edhe paralajmëroi vetë. Kështu, disa nga propozimet më kontroverse të tij gjatë kandidimit të tij për president, janë fshirë nga faqja zyrtare e fushatës të enjten, përfshirë edhe thirrjen e tij për të ndaluar hyrjen e muslimanëve në Amerikë si dhe premtimin për të anuluar marrëveshjen e Parisit për klimën.
Linku që përmbante propozimin e tij të 7 dhjetorit titullohej: “Deklarata e Donald J. Trump për parandalimin e emigracionit musliman”, në të cilin ai bënte thirrje për një mbyllje të plotë të dyerve ndaj hyrjes së muslimanëve në Shtetet e Bashkuara”. Ky link ka avulluar nga faqja e internetit, së bashku me listën e tij të përzgjedhjeve të mundshme për Gjykatën e Lartë kur të ishte president si dhe disa detaje të planit të reformave ekonomike, të mbrojtjes dhe ato rregullatore.
Fushata e Trump nuk iu përgjigj pyetjeve të shumta me email që kërkonin komente për këto ndryshime në faqe.
Linqet që tani i drejtojnë lexuesit në një faqe për mbledhje fondesh, duket se janë zhvendosur rreth ditës së Votimit, të martën, kur Trump arriti një fitore historike kundër rivales demokrate, Hillary Clinton, e kjo sipas regjistrit të veprimeve në faqen e fushatës.
Në një deklaratë për CNBC, princi saudit Al-Waleed bin Talal vlerësoi Trump se hoqi thirrjen për ndalimin e muslimanëve nga faqja e tij zyrtare dhe tha se Trump ka fshirë edhe deklaratat ofenduese ndaj muslimanëve në faqen e tij në rrjetet sociale.
Disa postime në Twitter që sulmonin muslimanët të shkruara kur Trump garonte për president mbeten në fakt në faqe.
Megjithatë, në një konferencë shtypi së bashku me liderët për të drejtat civile, Samer Khalaf, presidenti i komitetit arabo-amerikan kundër diskriminit tha se grupi është ende i shqetësuar për ndikimin e politikave të Trump mbi muslimanët.
“Ne e falënderojmë që i hoqi ato fjalë”, tha Khalaf, “por e dini çfarë, fjalët janë një gjë dhe veprimet një gjë krejtësisht tjetër”.
Ndërkaq, pjesa më e madhe e politikave të tij thelbësore mbeten në faqen e fushatës ku përfshihet edhe premtimi për të ndërtuar një muër në kufirin me Meksikën e detyrimi i Meksikës për të paguar për të.
Kjo nuk është hera e parë që fushata e Trump bën ndryshime të pashpjegueshem në faqe.
Përgatiti: Juli Prifti – /tesheshi.com/
