Nëse ju do shkaktoni një aksident me vdekje, do konsideroheni një vrasës dhe për këtë do merrni dënimin që i takon një vrasësi. Ashtu siç paralajmëroi ditë më parë ministri i Rendit, Saimir Tahiri është përgatitur tashmë drafti i një ndryshimi në kodin rrugor, ku parashihet që çdo drejtues automjeti i dehur apo nën efektin e lëndëve narkotike, nuk do të mund të favorizohet më nëse shkakton një aksident me pasojë plagosje apo vdekje. Në draftin e eskpertëve propozohet deri në 18 vite burg për këdo që shkakton një aksident me pasojë vdekjen.
Ja ç’thuhet më konkretisht:
Dënimi më i rëndë që propozohet me ndryshimet e kodit penal është ajo e pikës 2 ku çdo person në ndikimin e alkoolit, drogës që shkakton me automjet aksident nga pakujdesia me vdekjen e një personi dënohet nga 8 vite në 10 vite burg.
Kjo pikë shtohet si risi pasi aktualisht aksidenti me pasojë vdekjen i shkaktuar nga një drejtues mjeti nën efektin e alkoolit apo lëndëve psikotrope ka si masë ndëshkuese 3 vite burg.
Ndëshkimet e reja të propozuara për shkelësit e ligjit prekin dhe drejtuesit e motorrave dhe çiklomotorrave që nuk respektojnë rregullat dhe për ta.
Ndërsa çdo aksident me pasojë vdekjen e një apo më shumë personave e shkaktuar nga mos respektimi i rregullave të qarkullimit si manovër e gabuar, mosrespektim kufizim shpejtësie, semafori dhe sensin e lëvizjes propozohet të ndëshkohet me dënim maksimal deri në 18 vite.
Ndëshkimi rritet dhe për drejtuesit e mjeteve të cilët largohen nga vendi i aksidentit, kur ata kanë shkaktuar vdekjen e një personi marrin një dënim shtesë prej 5 vitesh dhe tre vite pë rata që largohen dhe pse kanë shkaktuar një aksident me pasojë plagosjen e një këmbësori.
Ky zhvillim vjen pas ngjarjes së tre ditëve më parë në Kamëz, ku një 22-vjeçar, Arnold Kola, në gjendje të dehur u përplas me furgonin e policisë duke shkaktuar vdekjen e një efektivi dhe plagosjen e dy të tjerëve. /tesheshi.com/
