Ndotja e Tiranës dhe apeli i bashkisë: Pastroni përtej pragut të shtëpisë nëse s’doni përmbytje

Në kushtet kur rrugët e Tiranës përmbyten me vetëm disa orë reshje shiu, bashkia apelon qytetarët të bëhen pjesë e një aksioni pastrimi. Në orën 08.00 të ditës së dielë (nesër) nënkryetari i këtij institucioni, Andi Seferi kërkon angazhimin e banorëve të kryeqytetit për mbledhjen e mbeturinave. Sipas tij, qeset plastike dhe lëndë të tjera të patretshme bëhen shkak për bllokimin e kanaleve kulluese. “Nga pastrimi i shtretërve të lumenjve gjatë përmbytjeve të ditëve të fundit u vu re se në pak kohë pastruam rreth 600 tonelata qese, mbetje, shishe plastike, gjë që tregon se jo vetëm pastrimi ka rëndësinë e vet, por edhe mirëmbajtja e qytetit është shumë e rëndësishme. Për këtë arsye, gjej rastin të ftoj të gjithë qytetarët, banorët e Tiranës, të minimizojnë përdorimin e qeseve plastike, sepse është një element i cili, nga kalimi që bën në zgara, puseta, kanale përfundon në shtretërit e lumenjve duke krijuar probleme shumë të mëdha, si ato që patëm para disa ditësh”, u shpreh Seferi. Ai theksoi se ky aksion duhet të shërbejë jo vetëm për të pastruar qytetin në një ditë, por edhe si ndërgjegjësim që qytetarët të mbajnë pastër qytetin, sidomos ne prag festash. Aksioni i nesërm nis që në mëngjes dhe do të vazhdojë përgjatë gjithë ditës. Ai do të shtrihet në të gjitha njësitë./tesheshi.com