Anëtarët e NATO-s kanë shprehur mbështetje për Shtetet e Bashkuara pasi Uashingtoni vendosi sanksione financiare kundër Rusisë dhe dëboi dhjetë diplomatë rusë.
“Anëtarët e NATO-s shprehin mbështetjen dhe solidaritetin e tyre me aleatin e tyre, Shtetet e Bashkuara, të cilat sot njoftuan masa në përgjigje të veprimtarive destabilizuese të Rusisë. Aleatët po ndërmarrin veprime, si individualisht ashtu edhe kolektivisht, për të forcuar sigurinë kolektive të Aleancës,” tha NATO në një deklaratë të enjten.
Qeveria amerikane njoftoi të enjten një vendim për të vendosur një seri sanksionesh financiare kundër Rusisë dhe për të dëbuar dhjetë diplomatë rusë në përgjigje të sulmeve kibernetike dhe ndërhyrjeve në procesin e zgjedhjeve presidenciale të SHBA, të cilat Uashingtoni i atribuon Rusisë.
NATO thotë në një deklaratë se Rusia ka treguar vazhdimisht sjellje destabilizuese, nga shkelja e sovranitetit dhe integritetit territorial të Ukrainës dhe Gjeorgjisë, përmes vazhdimit të shkeljes, mosrespektimit dhe anashkalimit të detyrimeve të shumta ndërkombëtare ndaj përpjekjeve për të ndërhyrë në zgjedhjet aleate, përfshirë zgjedhjet presidenciale të SHBA, përhapjen e keqinformimit dhe aktiviteteve kibernetike me qëllim të keq.
“Shtetet e Bashkuara dhe aleatët e tjerë vlerësojnë se të gjitha provat e disponueshme tregojnë përgjegjësinë e Federatës Ruse për t’u future në softuerin SolarWinds. Ne dënojmë sulmin ndaj Alexei Navalny, një përfaqësues i opozitës ruse, duke përdorur agjentë nervor nga grupi i ndaluar Novichok,” tha deklarata.
Aleatët i bëjnë thirrje Rusisë të ndalojë provokimet dhe menjëherë të fillojë zbutjen e tensioneve në kufirin me Ukrainën dhe Krimenë. Ata theksojnë se do të mbajnë qasjen e tyre ndaj parandalimit dhe mbrojtjes dhe thonë se mbeten të hapur për një dialog periodik me Rusinë. /tesheshi.com/
