Turqia ka shfrytëzuar një klauzolë të Traktatit të Uashingtonit për të kërkuar një mbledhje të jashtëzakonshme të NATO-s pas zhvillimeve të fundit dhe sulmeve ajrore të ushtrisë ndaj pozicioneve të ISIS-it dhe PKK-së.
Neni 4 i këtij traktati thotë shprehimisht se, “Palët do të këshillohen bashkarisht kurdoherë që, sipas mendimit të cilësdo prej tyre, kërcënohet integriteti territorial, pavarësia politike apo siguria e cilësdo prej palëve.”
Thirrjen e mbledhjes së NATO-s e ka bërë sekretari i përgjithshëm i saj, Jens Stoltenberg, dhe të 28 vendet aleate kanë për të diskutuar mbi situatën aktuale në Turqi.
Në një njoftim të aleancës ushtarak thuhet se, “Turqia e kërkoi takimin duke patur parasysh seriozitetin e situatës pas sulmeve të urryera terroriste në ditët e fundit, si dhe për t’i informuar aleatët për masat që po merr.”
Ushtria turke nisi të premten një seri sulmesh ajrore kundër objektivave të ISIS-it në Siri, të mbështetur dhe nga goditjet e artilerisë në kufirin tokësor. Fushata e sulmeve ajrore mori drejtim tjetër teksa në shënjestër u vunë dhe bazat kurde të PKK-së në pjesën irakiane të kufirit.
Neni 4 i NATO-s është përdorur dhe herë të tjera nga Turqia për thirrjen e takimeve të jashtëzakonshme, si në vitin 2003 dhe 2012. Të njëjtën gjë bëri dhe Polonia një vit më parë.
Shtetet e Bashkuara të Amerikës i kanë mbështetur sulmet ajrore të ushtrisë turke, ndërsa kancelarja gjermane, Angela Merkel, i ka kërkuar kryeministrit turk që të mos hiqet dorë nga procesi i paqes me kurdët, por ai të vijojë me gjithë vështirësitë.
Fundjava nuk ka qenë e qetë në Turqi. Pas arrestimeve të shumta, gjatë gjithë netëve ka patur përplasje mes demonstruesve dhe forcave policore në qytete të ndryshme të vendit. Gjatë javës pritet dhe mbledhja e parlamentit turk në një seancë të jashtëzakonshme. /tesheshi.com/
